Ismail Shehu është zgjedhur në detyrën e Kryetarit të Komisionit të Prokurimit Publik (KPP).
Ndërkohë, tre kandidatët për anëtarë të Komisionit: Fiorent Zguro, Ergys Streza dhe Kreshnik Tërnova janë skualifikuar.
Skualifikimi i tyre është paralajmëruar nga drejtori i Përgjithshëm i MCN TV, Endri Meksi, në daljet e tij, para dhe gjatë kohës kur kandidaturat e tyre ishin nën shqyrtim.
Meksi i ka akuzuar zyrtarët e KPP-së, përfshirë Zguron, për vendimmarrje të dyshimta lidhur me dosjen e AKSHI-t.
Kreshnik Tërnova është vënë nën hetim prej disa javësh nga Struktura e Posaçme Kundër Korrupsionit dhe Krimit të Organizuar (SPAK) për çështje që lidhen me shpërdorim detyre, tendera dhe mosdeklarim të saktë pasurie.
Emri i Tërnovës lakohet në dosjen e AKSHI-t si lidhje e drejtpërdrejtë me biznesmenin në arrati, Ermal Beqiri.
Ergys Streza ka mbajtur detyrën e inspektorit në KPP, ndërsa Fiorent Zguro ka mbajtur detyrën e nënkryetarit. Emrat e Strezës dhe Zguros rezultojnë në dosjen e SPAK për AKSHI-n.
Në këtë të fundit, ata shfaqen si bashkëpunëtorë për të mos pranuar kërkesën e biznesmenit Gerond Meçe, i cili pasi u lirua nga grupi kriminal që e detyroi të tërhiqte ankimimet.
Pak ditë më parë, Komisioni i Ligjeve dërgoi në Parlament 20 emra për tre vende vakante si anëtar në KPP dhe tre emra për postin e kryetarit të KPP.
Kandidatura e Shehut u miratua nga Kuvendi në seancën e sotme, me 78 vota pro. Më parë, ai ka mbajtur detyrën e Sekretarit të Përgjithshëm në Ministrinë e Drejtësisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
