Reali nuk e harron Lewandovskin

 Tashmë dihet  botërisht se objektivat  kryesorë  të Real Madridit për të përforcuar repartin e avancuar janë  Erling Haaland dhe Kylian Mbappe të cilët javë pas javë s’njohin asnjë limit në lidhje me progresin në skuadrat respektive si Borussia Dortmundi dhe Paris St Germain .

Statistikat bombastike të tyre  janë një indikator se i pret një e ardhme e shkëlqyer në kontinentin e vjetër  dhe ‘’ Galaktikët ‘’ sigurisht nuk pranojnë të ndalen deri në momentin e transferimit të njërit prej tyre në ‘’ Santiago Bernabeu ‘’ .

Në rastin e polakut mund të thuhet se është alternativa e tretë e shqyrtuar nga Carlo Ancelotti që kërkon të ketë lojtarë cilësorë në skuadër të cilët janë ekspertë të shënimit të golave dhe bomberi i Bayern Munchen e plotëson kërkesën e italianit.  

Favori i kryeqytetasve është se 33 vjeçari ka deklaruar  prej kohësh se e ka përfunduar ciklin tek bavarezët me të cilët ka shijuar trofe të shumtë si : 7 Bundesliga , 3 Kupa të Gjermanisë  dhe 5 Superkupa  dhe natyrisht që Real Madridit nuk i kanë shpëtuar këto statistika mbresëlënëse që lënë vend për entuziazëm . 

Megjithatë problemi i ‘’ Los Merengues ‘’ në këtë mes është se sulmuesi shtatlartë e përfundon kontratën në 30 qershorin e  2023-shit në ‘’ Allianz Arena ‘’  e cila i krijon të drejtën gjigandëve të Bundesligës  të pretendojnë sadopak fuqizimin e arkave për lojtarin më të mirë të Julian Nagelsmann . 

Në lidhje me Robert Lewandovskin , Real Madridi ndodhet midis dy zjarresh sepse pavarësisht se është një garanci absolute për shënimin e golave , i mbeten edhe pak vite në elitën e futbollit europian dhe duke e analizuar në këtë prizëm, drejtuesve do ti duhej të kërkonin alternativa të tjera për të riparuar problematikat në majën e sulmit. 

24 gola dhe 2 asiste në 18 ndeshjet e sezonit aktual jo vetëm që e shtojnë kërkesën e klubeve ndaj lojtarit të mirënjohur por e vënë në qendër të vëmëndjes duke i krijuar automatikisht një privilegj Bayern Munchen dhe trainerit Julian Nagelsmann i cili mund të vijojë i qetë punën sepse e di se në çdo ndeshje një lojtar i kalibrit të tillë është i destinuar për të qenë protagonist absolut.