Insistimi i drejtuesve të Real Madridit për të blerë Leny Yoron, duket se pak e nga pak po i jep rezultatet.
Sipas informacioneve nga burimet e klubit, ‘’ Galaktikët ‘’ janë afër arritjes së marrëveshjes me Lillen për mbrojtësin, i cili ka spikatur në sezonin e kaluar.
18 vjeçari premton shumë për të ardhmen dhe sipas gazetarëve Pablo Gallego dhe Tanguy Soyer negociatat kanë avancuar me sukses.
Këtë lajm e ka konfirmuar edhe eksperti i merkatos Fabrizio Romano, sipas të cilit dëshira e Leny Yoros është të jetë pjesë e ‘’ Los Blancos ‘’.
Megjithatë, ashtu siç ndodh rëndomtë, disa ekipe të kontinentit të vjetër si Manchester United, Liverpool apo Paris St Germain kanë tentuar për këtë lojtar, objektivi i të cilit është kalimi tek kryeqytetasit.
Mendohet se ditët vijuese do të jenë determinante për të ardhmen, duke qenë se përgatitjet për sezonin e ri fillojnë shumë shpejt dhe natyrisht Carlo Ancelotti do që ti ketë të gjithë lojtarët në dispozicion.
Mungesa e Eder Militaos dhe Antonio Rudiger, të cilët aktualisht janë duke shijuar pushimet, i përshpejton lëvizjet nga numri një i stolit, falë të cilit Real Madridi dominoi në Spanjë dhe Europë në sezonin e kaluar.
Prej kohësh në fakt kanë filluar tratativat për Leny Yoron, i cili pritet ti kushtojë xhepave të presidentit Florentino Perez 45-50 milionë euro, shtuar edhe bonuset referuar rendimentit që do të tregojë në fushë.
Të jesh pjesë e një klubi me shumë histori si Real Madridi në një moshë të tillë konsiderohet një sukses dhe një sfidë njëkohësisht pasi presioni është shumë i madh dhe duhet të japësh gjithmonë maksimumin për të fituar një vend në formacionin titullar.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
