Sfida me Teutën, Colella: T’i trajtojmë si Tirana, mungon vetëm një lojtar

Trajneri i Partizani, Giovani Colella, folur para mediave, në prag të sfidës që të kuqtë do të luajnë ditën e nesërme ndaj Teutës. Colella u shpreh se Teuta nuk duhet vlerësuar nga renditja, ndërsa shtoi se të gjitha ndeshjet duhet të përgatiten sikur përballë është Tirana.

Gjithashtu, tekniku italian zbuloi se mungesa e vetme për Partizanin, do jetë ajo e sulmuesit, Alfred Mensah.

E vetmja mungesë është e Mensah ditën e nesërme. Në ndeshje do të jenë lojtarët që janë të grumbulluar në Kombëtare, ndryshe nuk do të shkonin në përfaqësuese.

Deri në javën e kaluar, për Teutën flitej vetëm keq që rrezikonin rënien nga kategoria. Futbolli nuk është kështu. Teuta fitoi ndeshjen e kaluar dhe kjo tregoi që është skuadër shumë e rrezikshme. Janë dy shtete të vetme në botë që mendohet që skuadra e vendit të parë duhet ta fitojë ndeshjen ndaj asaj të vendit të fundit, ata janë Italia dhe Shqipëria. Teuta vlen më shumë se vendi i fundit. Do të jetë një kundërshtar shumë i vështirë si të gjitha ekipet. Të gjitha ndeshjet do t’i përgatisim sikur është ndeshja ndaj Tiranës.

Shpresoj që kur nuk bëhet gol të mos flitet vetëm për sulmuesit dhe kur nuk pësojmë gol. Me siguri me Kastriotin kemi qenë më pak efikas dhe preciz për rastet. Nuk kemi goditur vetëm shtyllën, por kemi goditur disa herë portën. Do të isha shumë i shqetësuar kur ta godisnim vetëm një herë portën gjatë një ndeshje. Nuk është vetëm Partizani që ka vështirësi kur i parkojnë autobusin përpara portës. Në të gjithë botën futbollistike, nga Holanda te Kongo, Japonia, Norvegjia dhe Shtetet e Bashkuara të Amerikës, kur një ekip parkon autobusin përpara portës ka vështirësi. Ne duhet të mësojmë që të luajmë këto lloj ndeshjesh. Nuk kanë të bëjmë pozitat e klasifikimit, por ne duhet të jemi më të aftë për të zgjidhur këtë ndeshje.

Bekim Rexhepi? Unë do të isha shumë i lumtur edhe nëse do të grumbullonin 20 futbollistë. Do të ishte kënaqësi e madhe edhe nëse Rexhepi do të ishte pjesë e Maqedonisë së Veriut, por nuk ka pasur asgjë.