Trajnerët e ekipeve kombëtare të moshave, FSHF emëron Cungun dhe Bulkun

Armando Cungu është zgjedhur nga FSHF për të zëvendësuar Nevil Deden si trajner të Kombëtares U-19. Këtë e ka lajmëruar vetë FSHF e cila ka sjellë disa rise, por ka bërë edhe konfirmime përsa i përket trajnerëve të kombëtareve të moshave.

Kështu Alban Bushi do të vijojë të jetë trajner i U-21, ndërsa Ervin Bulku, që ishte ndihmës i Edi Rejas, është zgjedhur të drejtojë ekipin e U-17.

KOMUNIKATA ZYRTARE E FSHF-së –

“Federata Shqiptare e Futbollit ka vendosur për emrat e trajnerëve të ekipeve Kombëtare të moshave. Zyra e Shtypit në FSHF bën me dije se Alban Bushi konfirmohet në këtë post dhe do të jetë sërish trajner i ekipit Kombëtar U-21. Ndërsa, ekipin Kombëtar U-20 do ta drejtojë tashmë trajneri i ri Ilias Haxhiraj.

Trajneri i ri i ekipit Kombëtar U-19 është Armando Cungu, kurse ekipin e moshës U-18 do ta drejtojë Ardi Behari.

Risia tjetër është emërimi i Ervin Bulkut si trajner i Kombëtares U-17. Ish-futbollisti i njohur ka qenë së fundmi edhe pjesë e stafit teknik të Kombëtares A dhe një nga ndihmësit e Edy Rejas. Gjithashtu, risi ka edhe për stolin e ekipit të moshës U-16 që do të ketë si trajner Agron Kërçovën.

Një tjetër konfirmim është ai i Armand Damës, i cili do të vazhdojë jetë trajner i Kombëtares U-15.

Trajnerët e ekipeve Kombëtare ishin në skadencë kontrate dhe pas një procesi konsultimi Federata Shqiptare e Futbollit mori vendimin përfundimtar, duke konfirmuar dy prej tyre dhe duke emëruar trajnerë të rinj në 5 ekipet e tjera.”