Shorti na vë përballë polakëve!/ Gazetari Ajeti: Sfida e vështirë, përparësi për ta terreni vendas dhe tifozëria e zjarrtë

Polonia do të përballet me Shqipërinë në shortin e playoff-it gjysmëfinal të Botërorit – një rival i vjetër për kuqezinjtë, të cilin Shqipëria e ka mposhtur në Tiranë gjatë eliminatoreve të Europianit.

Gazetari sportiv Jon Ajeti, në një lidhje për “MCN informacion”, parashikon se kjo do të jetë një sfidë e vështirë, ku përparësinë kryesore e ka Polonia falë terrenit vendas dhe tifozërisë së saj të zjarrtë.

Kjo fazë e playoff-it nuk do të jetë e lehtë për asnjë prej kombëtareve, përfshirë edhe ekipet e forta që kanë mbetur. Çdo ndeshje do të jetë e vështirë. 

Besoj se do të jetë një sfidë shumë e fortë. Përparësia kryesore në Varshavë është terreni vendas dhe tifozët e zjarrtë që ka Polonia. Këta faktorë padyshim i ndihmojnë.

Sipas Ajetit, nga opsionet e mundshme, Shqipëria ka rënë me kundërshtarin më të vështirë. 

Në vazon ku ishte Shqipëria, së bashku me Kosovën, mendoj se Polonia ishte ekipi më i fortë. 

Nuk mund të themi se shanset janë të barabarta, por unë e shoh Shqipërinë me rreth 30% mundësi ndaj polakëve, sepse Polonia ka lojtarë të jashtëzakonshëm dhe ende mbështetet shumë tek Robert Lewandowski.