“Lojtarët nuk janë paguar prej 2 muajsh”, klubi kosovar mbetet pa presidencë

Klubi kosovar i Drenicës ka njoftuar se ka mbetur pa presidencë. Këta të fundit kanë dhënë dorëheqjen, për shkak të problemeve financiare. 

Në njoftimin e Drenicës thuhet se kryesia është larguar, në pamundësi të financimit të klubit. Gjithashtu bëhet e ditur se lojtarët nuk janë paguar prej 2 muajsh. 

“Drenica mbetet pa kryesi.

KF Drenica merr një goditje të rëndë para derbit me Dritën në Gjilan.

Kryesia e klubit sot, pas situatës së krijuar në klub ka dhënë dorëheqje nga drejtimi i klubit.

Dorëheqja vjen si rrjedhojë e pamundësisë së financimit të klubit dhe pamundësisë për t'i permbushur obligimet e klubit. 

Që nga sot, klubi është i hapur për të gjithë të interesuarit për të mbeshtetur klubin dhe për të investuar në klub dhe për të çuar klubin përpara.

Kryesia e deritanishme falendëron Komunën e Skënderajt, bizneset, donatorët, sponsorët, stafin, lojtarët, punëtorët e klubit, tifozët dhe gjithë qytetarët e Skënderajit për mbeshtetjen gjatë kësaj kohe.

Kujtojmë se obligimet financiare nuk iu janë përmbushur futbollistëve tani e dy muaj dhe kjo ndikoi edhe në rënien e formës tek drenicasit të cilët e nisën edicionin në mënyrë fantastike.

Të shtunën Drenica udhëton në Gjilan për t'u përballur me Dritën në Stadiumin e Qytetit me fillim nga ora 13:00.”, thuhet në njoftim.