Juventus dhe Milan duel për Werner

 Mungesa e protagonizmit  të Timo Wernerit në sezonin e shkuar vijon të konsiderohet një mundësi ideale në merkato nga Juventusi dhe Milani.

‘’ Zonja e Vjetër ‘’ dhe kuqezinjtë kanë nisur ofensivën për gjermanin, për të cilin e ardhmja në ‘’ Stamford Bridge ‘’ është ndërlikuar sidomos pas transferimit të Raheem Sterling.  

Për 26 vjeçarin kjo periudhë konsiderohet determinante për ta mbyllur kapitullin e të kaluarës dhe të fillojë një tjetër eksperiencë në Serinë A .

Pritet  një duel gjigandësh sepse si bardhezinjtë ashtu edhe ‘’ Djalli ‘’ do të japin maksimumin për të firmosur me golashënuesin .

Fatkeqësisht aventura tek Chelsea nuk e ka bindur bashkombasin Thomas Tuchel për të besuar në aftësitë e ishi-t të Leipzigut edhe në të ardhmen dhe fakti i të qënit i pretenduar nga Juventusi dhe Milani sigurisht tregon se Timo Werner mbetet një lojtar tejet i rëndësishëm në metrat e fundit. 

Dy sezone në Londër nuk kanë mjaftuar për të siguruar të ardhmen tek kryeqytetasit , të cilët janë shoqeruar me 23 gola dhe 17 asiste në 89 sfida .

Momentalisht drejtuesit e ‘’ Bluve të Londrës ‘’ po e analizojne me kujdes këtë çështje dhe duhet parë në ditët vijuese nëse do të vendosin për huazimin apo shitjen e kartonit të Timo Wernerit  .

Në të kaluarën torinezët kaluan çdo pengesë në Serinë A , kampionat në të cilin u konsideruan rekordmenë me nëntë tituj rradhazi por në dy vitet e fundit nuk mundën të mposhtin fillimisht Interin dhe më pas kuqezinjtë e Stefano Piolit, arsye që e rrit përqëndrimin në merkato me objektivin e rikuperimit të terrenit të humbur në sezonin vijues.