Juventus-Inter në gjysmëfinale, Allegri: Ndeshje e vështirë, nuk mund të bëhen parashikime

Juventusi do të përballet me Interin të martën, në ndeshjen e parë për gjysmëfinalen e Kupës së Italisë.

Në prag të kësaj sfide, ka folur trajneri i bardhezinjve, Massimiliano Allegri, i cili deklaroi e pret një ndeshje të vështirë. Sipas Allegrit, kur luhet Juventus-Inter, nuk mund të bëhen parashikime.

Na pret një ndeshje kundër një skuadre të fortë që vjen pas disa humbjeve dhe do t’i duhet të reagojë. Jemi mësuar të luajmë çdo tri ditë dhe duhet të vazhdojmë në këtë kompeticion për të mbushur ditët edhe në muajin maj, duhet të qëndrojmë në Kupë, kampionat dhe Europa League.

Bëhet fjalë për një ndeshje gjysmëfinale dhe për Juve-Inter, nuk mund të bëhen parashikime. Duhet të krijojmë kushtet e duhura për të kaluar në finale dhe e rëndësishme është të tregohemi të vëmendshëm në fushë sepse shumë elozhe bëjnë dëm. Inter nuk po kalon një moment të mirë dhe këto skuadra janë të rrezikshme.

E vërtetë se kemi një bilanc pozitiv me Inter duke fituar dy përballjet e këtij sezoni. Inter ka një organikë të fortë në sulm. Duhet të shkojmë në finale dhe na duhet ekuilibër sepse unë e urrej entuziazmin e tepërt.