Osmani: Nuk duhet ta nënvlerësojmë Skënderbeun

Trajneri i Vllaznisë, Qatip Osmani, foli për mediat, në prag të sfidës që shkodranët do të luajnë këtë të premte ndaj Skënderbeut.

Sipas Osmanit, kundërshtari nuk duhet nënvlerësuar dhe të mos kalohet në eufori, pas rezultateve pozitive në javët e fundit.

Një atmosferë ndryshe në skuadër pas rezultateve të fundit dhe kjo gjë konstatohet lehtësisht. Megjithatë duhet të bëjmë kujdes sepse nesër kemi përballë një kundërshtar me djem të rinj dhe që luan bukur futboll.

Nuk duhet ta nënvlerësojmë kurrsesi Skënderbeun dhe as të kalojmë në eufori sepse në fund të fundit nuk kemi bërë asgjë më shumë sesa detyrën. Të futemi në fushë për të bërë më të mirën dhe ta synojmë fort fitoren për ta mbyllur si duhet këtë vit.

Kemi dy mungesa të rëndësishme siç janë Hakaj dhe Smajli, por do të mundohemi t’i zëvendësojmë me lojtarët e tjerë. Sa i takon merkatos, kanë filluar të përmenden emra, por nuk ka asgjë konkrete deri tani.