Anëtari i Komitetit Ekzekutiv në FSHF, Arben Dervishaj, për MCN, ka folur në lidhje me infrastrukturën për futbollin në Shqipëri. Ai deklaroi se stadiumi i Kukësit është gati dhe do të inaugurohet ditën e shtunë në orën 20:00.
Në lidhje me stadiumin e Partizani, Dervishaj u shpreh se ka një problematikë për një shpronësim dhe nëse rregullohet ajo, atëherë do të nisë puna për ndërtimin e një fushe të re.
Stadiumi i Kukësit është gati dhe po bëhen përgatitjet për ceremoninë. Do të luhet të shtunën në orën 20:00. Është gati dhe i përket kategorisë së tretë në UEFA. Aty mund të luhen ndeshjet e Europës, me përjashtim të ndeshjeve të grupeve, për shkak të kapaciteteve.
Në këtë moment ne duam të zhvillojmë futbollin e bazës, atë të fëmijëve dhe atë amator. Duam t’i kthejmë të gjithë stadiumet me fusha stërvitore. Nuk do jemi kundër për ndërtimin e stadiumeve të reja. Ka një mendim për ndërtimin e stadiumit të Besës së Kavajës. Pjesa më e madhe do investohet nga qeveria, por edhe FSHF është treguar e gatshme për të investuar. Është e konfirmuar që kryeministri Rama do të jetë në inaugurimin e stadiumit të Kukësit, sepse qeveria është bashkëfinancuese në masën 50% së bashku me FSHF në atë stadium.
Klubi i Partizanit ka një problematikë te stadiumi që nuk varet nga ne. Është një problematikë që ka të bëjë me një shpronësim, ose kalimin e një prone, që e ka Ministria e Mbrojtjes. Në momentin që ngërçi do zgjidhet, do investohet te fusha stërvitore. Tapeti që është vendosur sot do kalojë te fusha tjetër dhe fusha e stadiumit do të jetë me bar natyral.
Partneriteti me qeverinë ka qenë në nivele shumë të larta. Në pjesën e infrastrukturës ka qenë shumë i lartë. Stadiumin e Elbasanit e bëmë 50%-50%, në stadiumin e Shkodrës kemi investuar mbi 25%. Në “Air Albania”, qeveria na krijoi mundësinë të plotësonim atë formulë e cila e nxirrte këtë investim vizibël dhe ne kemi investuar në të. Kemi stadiumin e Kukësit dhe të Partizanit. Edhe në qytetet e tjera, ne kemi qenë të gatshëm.
“Selman Stërmasi” është një stadium që nuk na takon neve. Është një stadium që i takon Bashkisë së Tiranës dhe kanë lidhur një marrëveshje me klubin e Tiranës, për ta mbajtur atë stadium në menaxhim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
