Klodian Duro: Të rikthejmë Lushnjën në Superiore, Roma nuk u ndërtua për një ditë

Klodian Duro, u emërua si trajner i Lushnjës dhe këtë aventurë të re, e ka nisur me entuziazëm të madh.

Nëpërmjet një postimi në profilin e tij, Duro falënderon drejtuesit, që i besuan drejtimin e skuadrës, ku objektiv është ngjitja në Superiore.

Më tej ai bën edhe një ftesë, për të ndihmuar skuadrën, nga bizneset te tifozët, ndërsa shkruan se Roma nuk u ndërtua brenda një dite, por me shumë punë dita ditës.

Sezon i ri, sfidë e re, ekip i ri, objektiva të reja. Faleminderit kryetares së Bashkisë Eriselda Sefa dhe zotit Taulant Balla që më besuan drejtimin e vazhdimit të këtij projekti për krijimin e një klubi profesionist dhe për të rikthyer Lushnjën atje ku i takon, në Superiore.

Ftoj të gjithë bizneset, tifozët, qytetaret dhe çunat e Lushnjës t’i bashkohen e të mbështesin këtë projekt ambicioz, që fillon nga ekipet zinxhir të fëmijëve të Akademisë e deri tek ekipi A.

Roma nuk u ndërtua për një ditë, por me shume punë dita ditës. Dhe ne të bashkuar dhe me shumë punë do ja dalim ta rikthejmë Lushnjën në Superiore për të mirën e të gjithë fëmijëve, qytetareve dhe tifozëve lushnjarë.

Nga nesër, vetëm punë!