Mohamed Salah mori pjesë në stërvitjen e Liverpoolit, por nuk pritet të jetë në skuadër për ndeshjen e Champions League kundër Inter Milanit të martën.
Sulmuesi egjiptian, 33 vjeç, tha këtë fundjavë se ndihej “i lënë në baltë” nga klubi, ndërkohë që marrëdhënia e tij me trajnerin Arne Slot është tensionuar.
Sipas BBC, Salah ishte në stol gjatë barazimit 3-3 kundër Leeds United të shtunën, duke shënuar kështu ndeshjen e tretë radhazi që fillon nga stoli.
Stërvitja e së hënës u zhvillua përpara udhëtimit të Liverpoolit në Itali, dhe Salah u përfshi në seancë, e cila ishte e hapur për mediat.
Liverpool do të fluturojë drejt Italisë gjatë ditës së hënë, ndërsa Slot pritet të mbajë një konferencë për shtyp në mbrëmje.
Sezonin e kaluar, Salah shënoi 29 gola në Premier League dhe ndihmoi Liverpoolin të fitonte titullin, ndërsa këtë sezon ka shënuar 5 gola në 18 ndeshje në Premier League dhe Champions League. Ai nënshkroi një kontratë të re dyvjeçare me klubin në prill.
Wayne Rooney, ish-sulmuesi i Anglisë dhe analist i BBC, tha se Salah po “shkatërron legjendën e tij” te Liverpool dhe sugjeroi që Slot të mos e aktivizojë kundër Interit ose në ndeshjen e ardhshme në shtëpi ndaj Brighton.
Salah deklaroi: “Do të shijoj ndeshjen, sepse nuk e di çfarë do të ndodhë tani. Do të jem në Anfield për t’i përshëndetur tifozët dhe më pas do të shkoj në Kupën e Kombeve të Afrikës. Nuk e di çfarë do të ndodhë kur të jem atje.”
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
