Është mbyllur në barazim ndeshja hapëse e javës së 12-të e Kategorisë Superiores mes Tiranës dhe Kukësit.
Takimi zhvilluar në stadiumin “Selman Stermasi” u mbyll me rezultatin e bardhë 0-0 me të dyja ekipet që marrin vetëm nga një pikë duke mos gjetur ende shijen e suksesit.
Verilindorët ishin më pranë fitores në rast se sulmuesi Rexhinaldo do të tregohej i saktë në gjuajtjen e 11-metërshit.
Sulmuesi i Kukësit në goditjen e tij u ndal nga porteri Ilion Lika i cili rregulloi gabimin pas shkaktimit të penalltisë.
Ndërkohë, Tirana vijon kriza e rezultateve pasi kjo është ndeshja e pestë që nuk kanë arritur dot të marrin tre pikët.
Një ecuri negative për bardheblutë e drejtuar nga trajneri Ardian Mema i cili ende nuk e ka shijuar fitoren e parë në stolin e Tiranës të cilët ndodhen në pozita jo të mira në renditje.
Mirëpo ndeshja nuk është mbyllur në mënyrën më të mirë të mundshme. Menjëherë pas përfundimit të ndeshjes tifozët e skuadrës së Tiranës kanë pushtuar fushën e lojës duke u përplasur me lojtarët e tyre.
Në video shihet se ata i kërkojnë futbollistëve që të heqin fanellat pas ecurise negative që kanë pasur në javët e fundit.
Një situatë që do të sjellë pasoja të rënda për klubin e Tiranës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
