Luftëtari e ka nisur në mënyrën më të mirë të mundshme vitin e ri në Kategorinë Superiore duke marrë tre pikë në sfidën e javës së 17-të.
Gjirokastëritët mposhtën në fushën e tyre kryesuesit e kampionatit Skënderbeun me rezultatin e pastër 2-0.
Një 90 minutësh mjaft i mirë për skuadrën e drejtuar nga ana e trajnerit, Hasan lika, të cilët dhuruan një performancë shumë positive duke dominuar totalisht takimin ku spikati dyshja Bregu-Abazaj.
Dhe ishte pikësrisht mesfushori Kristal Abazaj që i dha suksesin bluzinjve duke shënuar një dopietë spektakolare.
Talenti i gjirokastritëve shënoi nga një gol në çdo pjesë në minutat 25-të dhe 85-të duke i dhënë suksesin e parë ekipit të tij në këtë vit.
Ndërkohë, korçarët ishin në një ditë shumë të keqe dhe loja e zhvilluar sot linte shumë për të dëshiruar.
Pas kësaj fitoreje Luftëtari ngjitet në vendin e shtatë me 22 pikë, ndërsa Skënderbeu mban vendin e parë me 37 pikë.
Ndërkohë, në dy ndeshjet e tjera të zhvilluara në të njëjtin orar, Teuta ka bërë një hap fals shumë të rëndë në fushën e saj kundër skuadrës së vendit të fundit Lushnjes.
Bregdetarët nuk shkuan me shumë se barazimi 2-2 në këtë duel që kënaq më së shumti lagunarët.
Golat e takimit në këtë sfidë për Teutën u shënuan nga Beqja dhe Cyrbja kurse për Lushnjën shënoi Sefa.
Ndërsa, Kamza e ka nisur me fitore duke mposhtur në fushën e saj Laçin me rezultatin 3-1.
Për vendasit autorët e golave u shënuan nga Ymeraj, Imeri dhe Mehmeti, ndërsa për Laçin shënoi Rexhinaldo.
Java e 17-të e Kategorisë Superiore do të mbyllet me dy ndeshjet e fundit që do të luhën në orën 17:00 që janë Flamurtari-Partizani dhe Vllaznia Kukësi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
