Puna e drejtuesve të Atletico Madridit në funksion të sezonit vijues tashmë ka filluar.
Traineri Diego Simeone vijon të ketë mbështetjen e padiskutueshme të presidentit Enrique Cerezo, falë të cilit ‘’ Los Colchoneros ‘’ kanë sfiduar ndër vite më të mirët e La Ligas dhe Europës gjithashtu.
‘’ El Cholo ‘’ e konsideron prioritet përforcimin e mesfushës dhe duke patur parasysh se largimi i Rodrigo de Paul do të jetë i paevitueshëm, tashmë pjesë e planeve të tij është bërë Richard Rios.
Kolumbiani është shëndërruar në një ndër më të mirët e Amerikës Latine, i cili përfaqëson Palmeiras, një ekip shumë cilësor në Brasileirao dhe në këtë kontinent.
25 vjeçari ka bindur si në kampionat ashtu edhe në Botërorin e Klubeve dhe La Liga mund të jetë destinacioni i ri i tij.
Kryeqytetasit prej shumë vitesh po mundohen të ndryshojnë historinë në kampionat dhe përtej tij por rivaliteti i ashpër nuk ia ka mundësuar arritjen e objektivit.
Thuhet se negociatat për transferimin e Richard Rios në ‘’ Wanda Metropolitano ‘’ kanë filluar, për të cilin mund të jetë eksperienca e parë në një ndër pesë ligat më të rëndësishme të Europës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
