Gjykata e Tiranës pezullon garën në FSHF, nuk ka zgjedhje më 2 mars pa u shqyrtuar paditë

Gjykata e Tiranës ka pezulluar garën e 2 marsit, për zgjedhjet në Federatës Shqiptare të Futbollit.

Gara për zgjedhjet në FSHF, është pezulluar deri në shqyrtimin e padive të bëra për Shoqatat Rajonale.

Në vendimin e saj, Gjykata e Tiranës thotë se FSHF nuk mund të bëjë zgjedhjet pa u shqyrtuar ankesat e bëra në Gjykatë.

Kështu Komiteti Ekzekutiv i FSHF së bashku me Komisionin e Verifikimeve, pezullohen për zgjedhjet e 2 marsit.

VENDIMI I GJYKATËS:

Ju informoj se kërkesa me nr. 274 Aki, e cila u gjykua nga gjyqtare znj. Fida Osmani me kërkues: Akademia Luftëtari dhe person të tretë: Federata Shqiptare e Futbollit, me objekt: marrjen e masës së sigurimit të padisë ka vendosur:

Pranimin e kërkesës së palës kërkuese.

Marrjen e masës së sigurimit të padisë duke vendosur:

1.Pezullimin e efekteve juridike të Vendimit nr. 1, datë 10.1.2022, të Komisionit të Verifikimit të FSHF-së, si dhe çdo veprimi apo akti tjetër të dalë në zbatim të këtij vendimi, për realizimin e mbledhjes së Asamblesë së Përgjithshme të Zakonshme Zgjedhore të FSHF-së të datës 02.03.2022, deri në zgjidhjen e konfliktit me një vendim të formës së prerë;

2.Pezullimin e efekteve juridike të Vendimit të datës 21.01.2022, të Komitetit Ekzekutiv të FSHF-së, si dhe të çdo veprimi apo akti tjetër të dalë në zbatim të këtij vendimi, për realizimin e mbledhjes së Asamblesë së Përgjithshme të Zakonshme Zgjedhore të FSHF-së të datës 02.03.2022, deri në zgjidhjen e konfliktit me një vendim të formës së prerë;

3.Pezullimin e veprimtarisë së Komisionit të Verifikimit të FSHF-së, në ushtrimin e kompetencave të tij statutore, për organizimin, mbikëqyrjen dhe drejtimin e Asamblesë së Përgjithshme të FSHF-së të datës 02.03.2022, deri në zgjidhjen e konfliktit me një vendim të formës së prerë.