Primera Division, të gjitha zhvillimet e javës së 27-të

Java e 27-të e Primera Division  startoi me ndeshjen e të premtes mbrëma midis Levantes dhe Valencias e përfunduar me rezultatin 1-0. Të besuarit e Paco Lopez hodhën një hap pozitiv pas disfatës së pësuar në fushën e Real Sociedadit javën e kaluar duke iu afruar edhe më shumë Europës  ndërsa  Valencia nuk mundi ta mbajë gjallë entuziazmin e fitores ndaj Villarealit në “Mestalla” dhe vazhdon të lundrojë në ujërat e mesit të tabelës, ekzaktësisht në vendin e 12-të. Java pasardhëse konsiderohet si shumë e vështirë për Levanten sepse do të luajë në transfertë kundër Real Betisit, ndërsa  Valencia pret në shtqpi surprizën e këtij sezoni në  Uefa Europa League, Granadën. 

Duhet theksuar se e shtuna rezultoi tepër interesante. Gjithçka startoi me sfidën Deportivo Alaves vs Cadiz  rivalë që nuk shkuan dot më larg se një barazim 1-1, fakt që penalizon më tepër të besuarit e Abelardo Fernandez sepse renditen të 3-t nga fundi  ndërsa për Cadiz situata është paksa ndryshe sepse janë plot 6 pikë larg zonës së ftohtë. Të dyja këto skuadra me padiskutim do t’i përqendrojnë maksimalisht forcat te java e ardhshme, e cila i rezervon sfida shumë të vështira në letër. Deportivo Alaves do të vizitojë “Wanda Metropolitanon”, ndërsa Cadizi udhëton në “La Ceramica”, ku e pret Villareali. Pas tyre e kishin radhën “Galaktikët” e Real Madridit që arritën një përmbysje kundër modestëve të Elches, falë dygolëshit të Karim Benzema. Të besuarit e “Zizou” mbeten 6 pikë larg Atleticos, ndërsa Elche rrezikon ndjeshëm qëndrimin në Primera Division sepse është vetëm 1 pikë larg zonës së ftohtë .Duhet theksuar se kjo fitore i ka shërbyer shumë nxënësve të Zinedine Zidane, të cilët do të kenë një detyrë të vështirë  të martën në mbrëmje sepse do të presin Atalantën për ndeshjen e kthimit të 1/8-tave të cilën do ta nisin me avantazhin  0-1  të arritur në Bergamo, ndërsa Elches nuk i mbetet gjë tjetër veçse t’i bëjë mirë llogaritë për javën e ardhshme në një fushë të komplikuar siç është ajo e “Sanchez Pizjuan”.

Ora 18.30 rezervoi një ndeshje pa shumë histori për faktin se Osasuna vs Real Valladolid përfundoi me rrjeta të paprekura.  Nga një rezultat i tillë më shumë janë dëmtuar “Blanquivioletët”, sepse janë vetëm 3 pikë larg rënies në Segunda Division, ndërsa  Osasuna me 6 të tilla. Javën e ardhshme, skuadra nga Pamplona do të udhëtojë në Huesca, ndërsa Real Valladolid do të presë  në “Jose Zorrilla” andaluzët e Sevillas.

Mbrëmja iu dedikua plotësisht kryesuesve të Atletico Madridit. “Los Colchoneros” nuk shkuan me tepër se një barazim 0-0 në fushën e Getafes, pa e anashkaluar vëmendjen nga ndeshja e kthimit kundër Chelsea-t që do të zhvillohet të mërkurën në mbrëmje. Cholo Simeone-s do t’i duhet t’i përveshë mirë mëngët në “Stamford Bridge” për të përmbysur disavantazhin 0-1. Parashikohet se këmbngulja e pakufijshme e argjentinasit me siguri do t’i shkaktojë shumë dhimbje koke trainerit Thomas Tuchel, ndërsa të ashtuquajturit “Los Azulones” kanë konfirmuar edhe një herë eksperiencën e hidhur që janë duke përjetuar në Primera Division sepse renditen të 15-tët në tabelë, fakt që do të mundohet ta ndryshojë në ndeshjen e javës së ardhshme, ku do të presin në “Coliseum Alfonso Perez” modestët e Elches, ndërsa kryeqytetasit do të përballen në “Wanda Metropolitano” me një kundërshtar të lehtë në letër si  Deportivo Alaves.