Edhe pse është ende herët tek Barcelona ka filluar të planifikohet e ardhmja.
Hansi Flicku bashkë me drejtuesit do të kenë një detyrë jo të lehtë përpara, me qëllimin e marrjes së vendimeve korrekte për vijimësinë.
Një ndër objektivat e trainerit gjerman është qëndrimi i Marcus Rashford i cili në sezonin e parë në ‘’ Camp Nou ‘’ po tregon se e meriton qëndrimin.
Anglezi numëron 10 gola dhe 10 asiste në 33 sfida, shumë i sikletshëm për çdo rival dhe një garanci për ‘’ Blaugranët ‘’ gjatë sfidave.
Sulmuesi e ka lënë pas të shkuarën dhe ka arritur përsëri të buzëqeshë, tek një ekip ku rivaliteti është shumë i ashpër.
Manchester United dhe Barcelona firmosën para disa kohësh huazimin e Marcus Rashford deri në fundin e sezonit aktual, përfshirë një opsion për blerjen e kartonit prej 35 milionë eurosh.
Si duket kjo shifër do të vihet në zbatim, edhe pse ishi i ‘’ Djajëve të Kuq ‘’ nuk ka qenë titullar i padiskutueshëm në 11-shen e numrit një të stolit.
Gjithsesi influenca e tij është e dukshme, një lojtar tejet i shpejtë, i aftë për të bërë diferencën në duelet një kundra një dhe një rrezik i vazhdueshëm në çdo aksion.
Tek ‘’ Los Cules ‘’ janë të ndërgjegjshëm për limitet në aspektin ekonomik por gjithsesi parashikohet se Joan Laporta do të bëjë një sakrificë për ekipin e zemrës.
Situata është në favorin e qëndrimit në Katalunjë duke qenë se Barcelona e ka gjetur një element që bën diferencën në metrat e fundit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
