Longo: Nuk jemi ndërtuar për të qenë Real Madrid apo Barcelona

Trajneri i Kukësit, Diego Longo, ka folur para mediave ditën e sotme, në prag të sfidës që skuadra e tij do të luajë me Teutën.

Ai deklaroi se Kukësi nuk është ndërtuar për të qenë Barcelona apo Real Madrid, por shtoi se diferenca me dy vendet e para është e rikuperueshme, pasi janë edhe 45 pikë në lojë.

“Kondicioni fizik është problemi i fundit për Kukësin. Në situata të tilla sigurisht që ka më shumë presion, kështu që duhet punuar më shumë në aspektin psikologjik. Kemi punuar gjatë gjithë javës dhe e dimë që duhet të kemi më shumë kujdes.

Në ndeshjen e parë që e humbëm luajtëm shumë keq, nuk e menaxhuam si duhet situatën. Është e vërtetë që Teuta ka ndryshuar shumë, do të ketë një ndeshje tjetër. Tani kemi më shumë përvojë dhe dimë se ta menaxhojmë një takim kundër këtij kundërshtari. Unë jam optimist, por gjithashtu e di bashkë me djemtë që duhet të japim 100%.

Nuk mund të them se vendi i parë dhe i dytë janë shumë larg. Janë edhe 45 pikë në lojë dhe kuptohet, kushdo që të humbë mes Tiranës dhe Laçit, ne kemi mundësi të ngushtojmë diferencën. Gjithsesi, ne duhet të mendojmë për veten, për ndeshjet tona. Duhet të punojmë fort, por duke e ditur që nuk jemi ndërtuar për të qenë Barcelona apo Real Madridi. Duhet të jemi të vetëdijshëm që gjithçka bëjmë është diçka më shumë, të luajmë pa presion.”, u shpreh Longo.