Presidenti i Partizanit, Gazmend Demi, në një lidhje telefonike në emisionin “Skaner” në MCN TV, u shpreh se trajneri Ilir Daja nuk ka asnjë problem me klubin dhe nuk rrezikon shkarkimin. Ai tha se po përgatit dhuratën e madhe për tifozët, siç është kompleksi i Partizanit, për të cilin tha se do të jetë gati në mes të nëntorit. Në lidhje me derbin ndaj Tiranës, Demi tha se shpreson te fitorja, por sipas tij, edhe nëse ajo nuk vjen, nuk është ndonjë çudi e madhe.
“Starova e tha shumë mirë. Fjala tifozeri është e madhe. Ne kemi bërë një akord me Dajën. Unë nuk jam specialist teknik. Jemi në fillimin e garës. Partizani i ka humbur pikët vetë, për shkak të gabimeve. Nuk ka asnjë problem mes presidentit dhe drejtorit. Olsi Rama merret më shumë me ekipin. Unë po punoj për dhuratën e madhe për tifozët, si kompleksi dhe akademia. Përveç meje, Daja e ka përkrahjen e drejtorit. Themi në se ka probleme dhe defekte, futbolli është si familje, ndonjëherë nuk ecin gjëra. Nuk ka asnjë ftohje mes Partizanit dhe Dajës si trajner. Edhe mua nuk më pëlqeu ndeshja me Kukësin, por të tjerat kanë qenë pozitive. Daja nuk ka asnjë problem.
Kam thënë njëherë se sa të jem unë, Tiranës nuk i ecën me Partizanit. E mira është që ne të fitojmë, por edhe po nuk fituam, nuk është ndonjë çudi e madhe. Presioni është pak më i madh te ne, sepse na duhen pikët. Shpresoj që në derbi të kemi edhe pak fat.
Ne nuk kemi pasur fat fare deri tani. Nuk ka përçarje mes klubit dhe trajnerit, këtë duhet ta kenë të qartë të gjithë. Kompleksi do të jetë gati në mes të nëntorit. Nuk heq kollaj njeri unë nga Partizani”, u shpreh Demi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
