Ligji për sponsorizimet/ Selmani: Kryeson Prishtina, futbolli përfitoi mbi 4 milionë euro gjatë 2024-ës

Naim Selmani nga “Klan Kosova” foli në emisionin “Mcn Informacion” mbi ligjin për sponsorizimin që i sjell afro 80 për qind të financimeve klubeve të futbollit në Kosovë.

Ai theksoi se në total futbolli ka përfituar 4,2 milionë euro gjatë 2024-ës, shifër që është tejkaluar nga basketbolli me 4,6 milionë.

Sa i takon ekipeve të futbollit, Selmani tha se Prishtina ka përfituar më shumë gjatë vitit që lamë pas, përkatësisht 1,1 milionë euro. 

“Një nga vendimet më të mira ka qenë miratimi i ligjit për sponsorizimin në 2016-ën. Ideja ka qenë që tatimi për vlerën e shtuar të zhvendosej te klubet. E njëjta shumë që kanë pasur për shtetin, kompanitë mund ta dedikojnë në sport. Prishtina ka përfituar më shumë gjatë 2024-ën, 1,1 milionë euro, dhe gjithë procesi monitorohet nga administrata tatimore e Kosovës, Ballkani dhe Gjilani janë skuadrat e tjera që kanë përfituar, dhe e fundit Dukagjini. Ideja është që t’i si klub u ofrohesh sponsorëve për t’ua kërkuar shumën, për t’i bindur. Kjo formë i ndihmon klubet në 80 për qind të financimit. Klubet kanë edhe pronarë që janë investitorë po ashtu. Në futboll s’ka fonde të mëdha nga komunat. Përfitojnë sportet e tjera si karate, boks, që janë me shpenzime më të ulëta. Në total futbolli ka përfituar 4,2 milionë euro dhe basketbolli 4,6 milionë euro. Për mua ka qenë befasi sepse e konsideruam futbollin si sport më masiv. Ka kompani të pijeve, ndërtimit, kompani të sigurimit. Zakonisht janë brand-et më të mëdha që reklamojnë produktin e tyre”.

I pyetur mbi praninë e trajnerëve nga Shqipëria në Kosovë, ai u shpreh:

“Ka pasur aktivitet të trajnerëve të Shqipërisë në Kosovë. Tashmë është vetëm një Orges Shehi, që drejton Ballkanin. Ekipet e Kosovës janë fokusuar te trajnerët e huaj, apo trajnerët me përvojë në Kosovë. Por ajo që bëri Ilir Daja në futbollin e Kosovës besoj do mbetet trashëgimi. Çuditem me faktin që shumë pak trajnerë kosovarë kanë pasur hapësirë në Shqipëri”.