Ferrari prezanton makinën e re në Formula 1, SF90 pritet ti sjell titullin pas 10 vitesh (FOTO)

Ferrari ka prezantuan makinën që shpresojnë t'i japë fund një dekade të gjatë të thatësirës së Formula 1 në 2019.

Paraditen e sotme është bërë prezantimi i njëvendëshes pretendente për titullin kampion në vitin 2019 të Formula 1. “Misioni fitore”, është ky emri që drejtuesit e “kokëkuqes” i kanë vënë makinës së re SF-90 (Scuderia Ferrari 90).  Numri 90 është vendosur me rastin e 90-vjetorit të krijimit të Ferrarit.

Makina e re i është përshtatur ndryshimeve në rregullore, me një pjesë të përparme më të ulët dhe ngjyra e makinës është tërësisht e kuqe, me disa shigjeta të zeza në pjesën e pasme dhe të poshtme të saj. Këtë vit, makina do të pilotohet nga veterani Sebastian Vettel dhe një i ri i talentuar si Charles Leclerc.

Ndryshime edhe në stafin drejtues, pasi tani në krye të Ferrarit është Mattia Binotto, njeriu që do të udhëheqë “kokëkuqen” drejt rikthimit në majën e këtij sporti. “Ndryshimet janë bërë dhe kemi vijuar projektin e nisur një vit më parë, duke patur një makinë më të fuqishme. Besojmë shumë te puna e bërë dhe se do të vijnë rezultatet”, tha Binotto.

Natyrisht që vëmendja është te Sebastian Vettel, në sezonin e tij të pestë me “kokëkuqen”, por në kërkim të titullit të parë me Ferrarin. “Ky është një sezon i rëndësishëm, ku objektivi është vetëm fitorja. Nuk ka më vend për dështime apo gabime dhe besoj se me ndihmën e të gjithëve do t’ia dalim mbanë të realizojmë objektivat”, tha Vettel.

Leclerc, i promovuar pas një sezoni debutues mbresëlënës me ekipin Sauber, tha: "Unë jam jashtëzakonisht i emocionuar për të filluar këtë aventurë të re. Ka qenë një ëndërr që nga fëmijëria kështu që është një ditë shumë emocionale për mua.

Ferrari humbi titullin duke u mundur nga rivali i tij i drejtëpërdrejtë Mercedes, pavarësisht se kishte një makinë të shpejtë përball rivalëve të tyre, pas një seri gabimesh si nga Sebastian Vettel por dhe nga ekipi.