Lewandowski kërkesë për Bayernin

Të qënit një bomber si pak të tjerë , i jep natyrisht shumë privilegje Robert Lewandowskit në lidhje me të ardhmen .

Pretendentët për polakun janë disa dhe prej kohësh flitet se ky sezon mund të shënojë fundin e eksperiencës së ishi-t të Dortmundit në ‘’ Allianz Arena ‘’.

Eleminimi nga Champions League i ka dhënë përgjigje shumë çështjeve në kampin bavarez dhe së fundmi është përfolur edhe për një paraakord të 33 vjeçarit me Barcelonën .

Megjithatë tentativat e agjentit  Pini Zahavi për qëndrimin e Robert Lewandowskit vijojnë të pandërprera të cilat sipas gjermanes ‘ Bild ‘ përfshijnë një përfitim vjetor prej 30 milionë eurosh , shumë e majme në sytë e drejtuesve të Bayern Munchen.

Nuk mund të anashkalohen tentativat e pareshtura të rekordemënve të Bundesligës për t’ia reduktuar rrogën ishi-t të Dortmundit por si duket kjo teori nuk do ti çojë gjëkundi pasi palët e përfshira janë të bindura për kërkesat respektive dhe synojnë ti shkojnë deri në fund kësaj historie.

Sigurisht idetë e golashënuesit për të ardhmen kanë ngjallur një lloj  shprese për pretendentët , në veçanti Barcelonën e cila kërkon medoemos ta transferojë në ‘’ Camp Nou ‘’ për të mos e ndalur vrullin drejt sukseseve ndërsa për Bayernin natyrisht gjërat sa vinë e vështirësohen pasi është një ndër lojtarët më produktivë të kontinentit të vjetër. 

Arritja në këtë stad sigurisht i jep të drejta absolute për çdo lloj kërkese sepse i ka përmbushur me përpikmëri detyrat në ekipin e Julian Nagelsmann, trainer që i dha lamtumirën Champions Leagues , duke riktheksuar protagonizmin e Unay Emery-t në kompeticionin më të rëndësishëm europian për klube.