Fitorja me Flamurtarin, Bellai: Puna shpërblehet, por të jemi me këmbë në tokë

Trajneri i Bylisit, Arian Bellai, u shfaq shumë i lumtur, pas fitores që skuadra e tij regjistroi ndaj Flamurtarit në shtëpi.

Për MCN TV, Bellai deklaroi se puna e bërë në stërvitje, po shpërblehet në fushë, por i kërkoi skuadrës që të jenë me këmbë në tokë.

Sigurisht që jam i kënaqur për çunat dhe duhet t’i jap komplimentet më të mira sepse sakrifikojnë për të qëndruar këtu lartë. Nuk është e thjeshtë që të rrish këtu lartë dhe të të ndjekin ekipet e tjera. Punojnë shumë, sakrifikojnë shumë dhe këtë ja shpërblen fusha e lojës, ku dhe sot arritëm të fitonim në fushën tonë dhe të kemi atë distancën nga ekipet që na ndjekin si rivali kryesor që ishte sot, ekipi i Flamurtarit, edhe ekipet e tjera që vijnë nga pas.

Unë e di politikën e klubit, pasi dhe çunat që janë në pankinë janë çuna të rinj dhe ata mësojnë, punojnë dhe në të ardhmen do jenë pjesë e Bylisit, siç janë Trumçi, Abazaj e shumë futbollistë të tjerë. Kjo është politika e klubit dhe këtë vazhdon të bëjë presidenti. Ky është çelësi i suksesit, sepse këta çuna punojnë bashkë dhe bëjnë më të mirën në fushën e lojës.

Sigurisht që duhet të jemi modestë, nuk duhet të fluturojmë, duhet të jemi me këmbë në tokë, duhen dhe 8 ndeshje që të mbyllet faza e dytë. Kemi shumë rrugë përpara për të bërë, duhet të punojmë ashtu siç edhe po bëjmë.

Duhet të punojmë për ndeshjen e kësaj jave në Berat dhe do jemi kokulur. Duhet të punojmë siç kemi punuar deri tani. Nuk duhet të jesh komod në futboll.