Mbi 1.000 garues morën pjesë në Kampionatin Evropian të Karatesë për kadetë, juniorë dhe grupmoshën U21, i cili u mbajt gjatë fundjavës në Limasol të Qipros. Megjithatë, në këtë ngjarje madhore kontinentale munguan karateistët e Kosovës.
Federata e Karatesë e Kosovës vendosi të tërhiqet nga Kampionati Evropian pasi autoritetet e Qipros, shtet që nuk e njeh pavarësinë e Kosovës, ndaluan përdorimin e flamurit dhe simboleve shtetërore të Republikës së Kosovës. Pjesëmarrja pa simbole shtetërore nuk ishte opsion për palën kosovare.
Federata kosovare kishte marrë konfirmim javë më parë se sportistët e saj nuk do të lejoheshin të garonin me të drejta të barabarta me përfaqësuesit e vendeve të tjera. Kjo erdhi pas komunikimit zyrtar me Ministrinë e Punëve të Jashtme të Qipros, Federatën e Karatesë të Qipros dhe Federatën Evropiane të Karatesë (EKF).
Vendimi për ndalimin e simboleve shtetërore u mor nga Qeveria e Qipros dhe u pranua nga EKF, çka bëri që karateistët kosovarë të mbeteshin jashtë garës që nisi të premten dhe përfundoi të dielën. Përfaqësuesja e Kosovës nuk u lejua të paraqitej në mënyrë të barabartë, ndaj u vendos që ekipi të mos udhëtonte për pjesëmarrje.
Në një letër të datës 16 janar, Ministria e Punëve të Jashtme e Qipros sqaroi arsyen e këtij vendimi:
“Republika e Qipros nuk e njeh pavarësinë e shpallur në mënyrë të njëanshme të Kosovës. Marrë parasysh këtë fakt, Republika e Qipros nuk lejon përdorimin e simboleve që mund të nënkuptojnë njohje.”
Komunikimi i sekretarit të përgjithshëm të Federatës së Karatesë së Kosovës, Nazmi Gashi, kishte nisur më 12 janar me sekretarin e përgjithshëm të EKF-së, Davor Cipek, i cili kishte theksuar se pjesëmarrja e Kosovës varet nga rregullat e përcaktuara nga autoritetet qipriote.
Më 20 janar, Federata kosovare pranoi edhe një letër nga presidenti i Federatës së Karatesë të Qipros, Fotis Marathovouniotis, ku thuhej se qeveria e Qipros nuk lejon shfaqjen e flamurit, himnit apo simboleve shtetërore të Kosovës. Në të njëjtën letër, propozohej që Kosova të merrte pjesë nën simbolin e Federatës së Karatesë së Kosovës, pa elemente shtetërore.
Tri ditë më pas, kryetari i Komitetit Organizativ të EKF-së, Marton Falusi, njoftoi se federata evropiane është e obliguar t’i respektojë ligjet e Qipros dhe se një zgjidhje e mundshme do të ishte pjesëmarrja e Kosovës nën emrin dhe flamurin e federatës sportive, propozim që u refuzua nga pala kosovare.
Federata e Karatesë e Kosovës e cilësoi këtë formë përfaqësimi si të pabarabartë dhe diskriminuese.
Ky nuk është rasti i parë që Kosova përballet me një situatë të tillë në Qipro.
Edhe tre vjet më parë, në Kampionatin Evropian për kadetë, juniorë dhe U21, karateistët kosovarë nuk u lejuan të paraqiteshin me të drejta të barabarta dhe atëherë, në vend të garimit, ata kishin qëndruar në tribuna.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
