Akademia e Futbollit “Luftëtari” ka kallëzuar në Prokurorinë e Gjirokastrës sekretarin e përgjithshëm të FSHF, Ilir Shulku me akuzat: Falsifikim dokumentesh, shpërdorim detyre dhe falsifikim kompjuterik. Për këtë, përfaqësuesi i klubit Nertil Nebiaj, në një lidhje skype në MCN TV është shprehur se zgjedhjet e Shoqatës Rajonale të Futbollit Gjirokastër të zhvilluar pak ditë më parë janë në kundërshtim me ligjin.
Ai tha se në mbledhjen e mbajtur më 30 janar, 4 nga 6 delegatët e pranishëm, ishin zgjedhur në mënyrë të paligjshme.
“Ditën e hënë, në kemi depozituar një kallëzim penal, ku kemi paraqitur me fakjte, shkeljet e Shoqatës Rajonale të Fuitbollit Gjirokastër. Shkeljet fillojnë që më 29 janar, kur ishte planifikuar mbledhja e parë e anëtarëve. Kjo ishte planifikuar në orën 13:00, në stadiumin Luftëtari.
Nga kryetari i Shoqatës, nuk janë respektuar normat statuore, për të verifikuar kuorumin e mbledhjes. Një ditë më vonë, u mbajt mbledhja në një hotel të qytetit dhe aty nga 6 delegatë që ishin, 4 prej tyre ishin zgjedhur në mënyrë të paligjshme, duke mos u mbështetur në asnjë pikë të statutit.
Në shkresën që Shoqatat Rajonale e Futbollit Gjirokastër na ka dërguar, nuk është i përmendur përfaqësuesi i Akademisë së Futbollit Luftëtari, Lefter Millo. Në mbledhjen e 30 janarit, ata kanë krijuar një delegat, për Akademinë e Futbollit Luftëtari. Ky delegat është i zgjedhur në mënyrë të paligjshme.”, u shpreh Nebiaj.
Edhe kryetari i kësaj Zyrës Rajonale Gjirokastër, Sadik Sadikaj është kallëzuar gjithashtu në Prokurori, ndërkohë që tre përfaqësues nga kjo shoqatë do të marrin pjesë me të drejtë vote në Asamblenë e Përgjithshme të FSHF më 2 mars, kur do të zgjidhet edhe presidenti.
Ndërkohë, edhe Krimi Ekonomik në Policinë e Gjirokastrës ka nisur të hetojë zgjedhjet e zhvilluara në Zyrën Rajonale të Gjirokastrës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
