Ballkani nuk ka stadium për ndeshjen në Champions League, reagon klubi: E turpshme, nuk e dimë ku do luajmë

Ballkani po përballet me një situatë aspak të këndshme, para ndeshjes me skuadrën e Ludogorets, në turin e parë në Champions League. Kampionët e Kosovës, nëpërmjet një postimi në rrjetet sociale, shkruajnë se ende nuk e dinë se në cilin stadium do të luajnë. Situatën e krijuar, klubi i Ballkanit e quan të turpshme dhe presin që gjithçka të zgjidhet shpejt. POSTIMI I KLUBIT: “Every ëonder lasts three days” (Çdo çudi zgjat 3 ditë) Kjo proverb hungareze e përhapur në gjithë botën, duket se vetëm në Kosovë nuk përshtatet, ngaqë këtu çudirat e shkelin njëra-tjetrën vazhdimisht, e zgjasin pafund. Një shtet me aspirata sportive për ta zënë Evropën, vazhdon ta çuditë krejt kontinentin, duke mos qenë gati as me kushtet minimale. 4 ditë kanë mbetur deri te data e zhvillimit të ndeshjes më të madhe shtetërore për klube, në nivelin më të lartë të mundshëm, siç është Liga e Kampionëve, e ne ende e kemi të turbullt se ku do të luhet ai duel kualifikues. Në vend se krejt përqendrimi e vëmendja e futbollistëve dhe stafit të skuadrës tonë, të jetë e fokusuar në futboll, ne përballemi me ngarkesë psikologjike se çfarë po ndodh me fatin e takimit, të datës 11 Korrik. Shtetin që e duam dhe mundohemi për ta prezantuar në mënyrën më të mirë, të huajt me vetëm një kërkim në google, na e kthejnë në përqeshje. Si të arsyetohet kjo? Ne si klub, kemi arritur të shkruajmë histori ndërkombëtare, duke u futur në mesin e skuadrave që luajnë në nivele të larta evropiane, kurse sot pa kaluar një vit i plotë, ne të njëjtit me të cilët u krenuan të gjithë, nuk kemi informacion se ku do ta zhvillojmë ndeshjen eliminatore të UEFA Champions League, ose mbase një pyetje tjetër, a do ta zhvillojmë fare? Kosova ka nevojë për infrastrukturë, lojtarët tanë kanë nevojë për qetësi para këtyre dueleve të mëdha, jo stres e turp karshi homologëve të tyre nëpër skuadra evropiane. Po, është e turpshme kjo që po ndodh, për çdo keqardhje!