Berat Gjimshiti ishte heroi i Atalantës në Europa Ligë, në sfidën ndaj grekëve të Olimpiakos që bergamaskët fituan 2 me 1. Mbrojtësi i Shqipërisë, shënoi dy gola, në harkun kohor të 2 minutave dhe i dha fitoren italianëve.
Pas pjesës së parë që ishte mbyllur me avantazhin e miqve, pas golit të Soares, në të dytën Gjimshiti ndryshoi rrjedhën e gjithë lojës.
Në minutën e 61, shqiptari barazoi shifrat, ndërsa 2 minuta më vonë shënoi edhe golin e përmbysjes.
Pas ndeshjes, Gjimshiti u shfaq i lumtur, teksa deklaroi se i kishte munguar goli.
“Folëm me njëri-tjetrin pas fundit të pjesës së parë për të kuptuar çfarë nuk shkonte. Thamë se duhej të zgjoheshim dhe të fitonim. Shpirti që treguam në pjesën e dytë ishte ai i duhuri.
Fillimisht jam i kënaqur për fitoren, na mungonte prej shumë kohësh në shtëpi. Ashtu siç më mungonte mua goli”, tha Gjimshiti.
Ndeshja e kthimit do të luhet pas një jave në Greqi, me të dyja skuadrat që do të kërkojnë kualifikimin në tetë më të mirat.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
