Kombëtarja shqiptare e 21-vjeçarëve mposhti me rezultatin 2-0 Andorrën, në “Elbasan Arena”, në ndeshjen e vlefshme për kualifikueset e Europianit të 2023.
Kuqezinjtë zhvilluan një ndeshje shumë të mirë, ku kishin disa raste të arta shënimi, por që nuk u shfrytëzuan si duhet. Rasti i parë i pastër erdhi në minutën e 19-të, me Ndreckën që kroson bukur për Tedi Carën në zonë, por gjuajtja e këtij të fundit me kokë, u ndal nga portieri i Andorrës.
Pas disa rasteve, goli erdhi në minutën e 36-të, me Ernest Muçin që ekzekuton në mënyrë perfekte një goditje dënimi, duke e ndalur topin në fundin e rrjetës.
Pjesa e dytë nis me kuqezinjtë më kërkues, që provojnë të gjejnë edhe golin e dytë. Mundësia ishte në minutën e 70-të, kur Dobra fiton penallti, por Muçi gabon nga pika e bardhë e 11-metërshit.
Për të vulosur sfidën, mendoi protagonisti absolut i këtij takimi, Ernset Muçi, i cili në minutën e 90-të, shënoi një tjetër gol spektakolar nga goditja e dënimit, duke fiksuar shifrat në 2-0.
Me këtë fitore Shqipëria ngjitet në vendin e dytë në grupin G me 6 pikë, 3 pikë më pak se Çekia kryesuese. Shpresat e Bushit do të zbresin sërish në fushë të hënën e 11 tetorit, kur presin në “Elbasan Arena” Slloveninë, në sfidën e planifikuar për t’u zhvilluar në orën 18:30.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
