Kryeqendra e veriut ka mirëpritur me sukses edicionin e dytë të “Maratonës së Shkodrës”, një aktivitet sportiv masiv që mblodhi këtë herë mbi 550 garues të moshave dhe kategorive të ndryshme.
Eventi u organizua falë një bashkëpunimi të ngushtë mes Bashkisë Shkodër, Shoqatës së Atletikës Vllaznia dhe Federatës Shqiptare të Atletikës.
Gara e këtij viti u nda në dy etapa kryesore sipas distancave dhe grupmoshave: Distanca 2.5 km: E dedikuar për kategoritë e të rinjve të moshave 10–15 vjeç dhe 16–18 vjeç, duke promovuar edukimin sportiv që në hapat e parë dhe distancat 5 km dhe 10 km- për vrapuesit profesionistë dhe amatorë të pasionuar pas sfidave të gjata.
Kryetrajneri i atletikës së Vllaznisë, Albert Marashi, shprehu besimin se ky aktivitet do të pësojë rritje të ndjeshme nga viti në vit.
Ai tha se objektivi i radhës është arritja e 1000 garuesve në edicionin e ardhshëm, ndërsa shfrytëzoi rastin për të kërkuar një vëmendje më të shtuar drejt rritjes dhe përmirësimit të infrastrukturës sportive në qytet.
Përtej aspektit kompetitiv, vrapuesit përcollën gjithashtu mesazhe të forta sociale, duke u fokusuar te rëndësia e jetës aktive për të rinjtë dhe ndihma e mbështetja e vazhdueshme ndaj fëmijëve jetimë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
