Bejzade: Mund të ishim më të zgjuar në mbrojtje, Egnatia është ekipi më i mirë në Superiore

Trajneri i Laçit, Skerdi Bejzade, foli për MCN TV, pas humbjes që skuadra e tij regjistroi ndaj Egnatias.

Bejzade deklaroi se skuadra e tij kërkonte barazimin pas 1-0 dhe po bënte mirë, por shtoi se duhet të ishin më të zgjuar në mbrojtje. Sipas tij, filozofia e ekipit është të luajë në sulm dhe jo në mbrojtje.

E pashë Egnatian me Partizanin dhe për mua është ekipi më i mirë në Superiore. Pësuam një gol të lehtë nga Dwamena. Gjithsesi u munduam të reagojmë. Nuk qëndruam në mbrojtje, por sulmuam. U munduam, por mungoi saktësia në metrat e fundit.

Ne jemi ekip i ri, kishim Melon me virozë dhe Sobovale kishte probleme në kofshë. Nuk frikësoheshim vetëm për këtë ndeshje, por edhe për të ardhmen, kur ka probleme te lojtarët. Kampionati është i gjatë dhe vjen duke u vështirësuar.

Ne e mbajtëm mirë deri në 1-0. U munduam të barazonim. Rrezikuam, nuk kishim pse të mbanim ekuilibrat. Mbrapa mund të ishim më të zgjuar. Synimi ynë ishte të vazhdonim presingun lart. Duke ditur kualitetin e Egnatias dhe sulmuesit që mund të shënojnë në çdo moment.