Erling Haaland vazhdon të shkruajë historinë me fanellën e Norvegjisë.
Sulmuesi 25-vjeçar realizoi dy gola në fitoren 2-1 ndaj Brazilit, duke i siguruar kombëtares norvegjeze kualifikimin historik në çerekfinalet e Kupës së Botës për herë të parë.
Edhe pse pati vetëm katër prekje brenda zonës së rreptësisë gjatë ndeshjes së 1/8-ave, Haaland tregoi edhe një herë instinktin e tij vrasës përpara portës.
Ai zhbllokoi rezultatin në minutën e 79-të, ndërsa 11 minuta më vonë vulosi fitoren me një goditje të saktë nga jashtë zone.
Me këtë dygolësh, ylli i Manchester City u ngjit në krye të renditjes për ‘Këpucën e Artë’, në kuotën e shtatë golave, së bashku me Kylian Mbappé dhe Lionel Messin.
"Nuk sheh lojtarë të tjerë që shënojnë gola të tillë. Nuk ishte as gjysmë rasti, por ai e ktheu në gol", tha ish-futbollisti skocez Pat Nevin për BBC Radio 5 Live.
Edhe ish-sulmuesi i Anglisë, Ian Wright, vlerësoi efikasitetin e norvegjezit: "Flitet shpesh për numrin e prekjeve të tij me topin, por ai nuk ka nevojë për shumë prekje për të bërë diferencën."
Falë golave të Haaland, Norvegjia eliminoi Brazilin dhe tani është vetëm tre fitore larg një titulli botëror historik. Në çerekfinale do të përballet me Anglinë, e cila kaloi Meksikën me rezultatin 3-2.
Sipas Wayne Rooney, ndikimi i Haaland shkon përtej golave.
"Ai i ka dhënë të gjithë vendit besimin se mund të arrijnë shumë larg në këtë turne", u shpreh ish-kapiteni i Anglisë.
Gary Neville shtoi se Haaland tashmë ka rrëzuar çdo dyshim për aftësinë e tij në skenën më të madhe të futbollit.
"Njerëzit thoshin se nuk e kishte provuar veten në skenën botërore. Tani kjo nuk mund të thuhet më."
Forma e sulmuesit është mbresëlënëse.
Ai ka shënuar shtatë gola në katër ndeshjet e këtij Botërori, ndërsa në total numëron 62 gola në 54 paraqitje me Norvegjinë, me një mesatare prej një goli çdo 71 minuta. Vetëm gjashtë prej tyre kanë ardhur nga pika e penalltisë.
Haaland ka shënuar në secilën prej 14 ndeshjeve të fundit zyrtare me kombëtaren, duke realizuar 27 gola gjatë kësaj periudhe.
Hera e fundit që ai mbeti pa shënuar në një ndeshje konkurruese ishte në tetor 2024, kundër Austrisë në Ligën e Kombeve.
Përballja me mbrojtësin brazilian Gabriel ishte një nga duelët më të komentuar para ndeshjes. Edhe pse në pjesën e parë u mbajt larg zonës,
Haaland përfitoi nga hapësirat në pjesën e dytë dhe e fitoi duelin vendimtar, duke shënuar golin e parë me kokë përballë mbrojtësit të Arsenalit.
Statistikat tregojnë se ai pati vetëm 30 prekje të topit dhe realizoi 13 pasime gjatë gjithë ndeshjes, ndërsa vlera e golave të pritshëm (xG) ishte vetëm 0.39. Megjithatë, edhe një herë, Haaland provoi se nuk ka nevojë për shumë raste për të vendosur fatin e një ndeshjeje.
Vetë sulmuesi beson se po arrin nivelin më të lartë të karrierës së tij.
"Kam arritur kulmin disa herë gjatë këtij turneu, por sa herë luaj duket sikur ngjitem edhe më lart. Nëse më krijohen një ose dy raste, zakonisht shënoj. Gjithçka varet nga përqendrimi dhe shfrytëzimi i mundësive që më jepen", deklaroi Haaland.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
