‘Triathlon Pogradec’ ka çelur edicionin e parë në qytetin bregliqenor, duke mbledhur rreth 120 sportistë nga Shqipëria dhe vende të ndryshme të rajonit dhe Evropës.
Kjo disiplinë sportive, e cila kombinon notin, çiklizmin dhe vrapimin, u zhvillua në dy kategori: Sprint dhe Olimpik.
Në kategorinë Sprint, garuesit përshkuan 750 metra not, 20 kilometra me biçikletë dhe 5 kilometra vrap, ndërsa në kategorinë Olimpike gara përfshiu 1 500 metra not, 40 kilometra çiklizëm dhe 10 kilometra vrap.
Organizatori i aktivitetit, Julian Lekoçaj, u shpreh se Pogradeci ofron kushte ideale për zhvillimin e këtij sporti dhe se synimi është që eventi të kthehet në një traditë të përvitshme.
Në garë morën pjesë sportistë nga Shqipëria, Kosova, Maqedonia e Veriut, Mali i Zi, Gjermania dhe Britania e Madhe, duke e kthyer Pogradec në një pikëtakim ndërkombëtar të sportit.
Në kategorinë Olimpike, fitues u shpall Albion Ymeri. Sportisti i ri nga Kosova kishte marrë pjesë më herët në maratonën e vrapimit në Pogradec, ndërsa këtë herë debutoi në një garë triatloni. Sipas tij, kushtet atmosferike ishin mjaft të favorshme dhe të ngjashme me klimën e Prishtinës.
Ndërkohë, në kategorinë Sprint triumfoi Genc Isufi. Ai u shpreh se segmenti më i vështirë i garës ishte noti, por arriti të ruante epërsinë deri në fund, duke kaluar i pari vijën e finishit.
Zhvillimi për herë të parë i këtij aktiviteti në Pogradec e ktheu qytetin juglindor në një qendër të rëndësishme të sportit ndërkombëtar, duke promovuar njëkohësisht turizmin dhe potencialin sportiv të zonës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
