Liga e Kombeve, Silvinjo: Grup i vështirë, por jemi të barabartë me kombëtaret e tjera

Trajneri i Shqipërisë, Silvinjo, foli pas shortit të Ligës së Kombeve, që e vendosi kombëtaren kuqezi në grup me Çekinë, Ukrainën dhe Gjeorgjinë.

Silvinjo deklaroi se është një grup i vështirë, por shtoi se kuqezinjtë janë të barabartë me kombëtaret e tjera.

Është gjithmonë nder të jesh këtu dhe të marrësh pjesë në një short të bukur si ky i sotmi. Kishte shumë njerëz dhe skuadra të rëndësishme këtu. Nuk është e thjeshtë, është një grup i vështirë. Nuk është e thjeshtë, të gjithë po rriten shumë. Kemi luajtur së fundmi me Çekinë, një skuadër e fortë. Gjeorgjia po ashtu, një ekip që po rritet shumë. Ashtu edhe Ukraina. Është një grup i fortë, fizik dhe i vështirë, por i bukur. Ecim përpara.

Ne duhet të luajmë. Është një kompeticion i vështirë. Gjithçka luhet brenda tre muajve, shtator-tetor-nëntor. Ky është një moment tjetër në jetën tonë për të bërë një përpjekje të madhe për të luajtur dhe për të provuar. Mendoj se jemi të barabartë me të gjithë ekipet. Është një grup i vështirë, por shumë i ekuilibruar.