Josa: Vllaznia nuk duhet ta ketë mendjen të aleancat, kemi vetëm një objektiv

Trajneri i Vllaznisë, Mirel Josa, ka folur para mediave, në prag të sfidës së parë të kampionatit, atë ndaj Erzenit në transfertë.

Tekniku i shkodranëve u shpreh se skuadra e tij ka objektiv vetëm ndeshjen e radhës, ndërsa shtoi se nuk dëshiron që të diskutojë për problemin e aleancave, pasi tha se është turp të flitet për këtë që në fillim të kampionatit.

Nuk do të thotë se është start dhe do e fitojmë. Do shkojmë me mendimin për ta fituar, nuk ka rëndësi niveli i skuadrës përballë, por si jemi ne. Duhet të vlerësojmë çdo ndeshje në maksimum sepse atëherë vlerësojmë punën tonë.

Bulatovic mungon, nuk do jetë në lojë për arsye dëmtimi, është dëmtuar në Pogradec. Unë e di maksimumin e lojtarëve, kemi të tjerë që mund ta zëvendësojnë.

Luajmë me një skuadër që ka treguar karakter në Kategorinë e Parë. Pa vlerësimin e kundërshtarëve, nuk mund të fitohet një ndeshje. E vlerësojmë maksimalisht Erzenin.

Në Shqipëri 6 skuadra deklarojnë që do dalin kampion. Shembullin e keni me Vllazninë që ishte 13 pikë para në kampionat dhe e humbi. Duhet të shohim çfarë do të bëjmë në fushën e lojës. Objektivi i skuadrës është të fitojë çdo ndeshje.

Për Malën ndodhi problemi me klubin tjetër dhe nuk besoj do jetë i gatshëm për nesër. Dhe të ishte me lejen e kalimit gati, nuk do mundej sepse gjendja e tij nuk është e gatshme. E kam kërkuar vetë Malën në skuadër sepse e dimë rendimentin e tij, prandaj shpresoj të zgjidhet çështja e letrave.

Nuk e diskutoj problemin e aleancave. Vllaznia do ketë problem grupin që do krijojë. Kur vjen puna e aleancave është turp t’i përmendim një ditë para fillimit të kampionatit. Në qoftë se fillojmë me aleanca do e kemi mendjen te aleancat që do bëjnë klubet e tjera. Klubet e tjera le të bëjnë çfarëdo aleanca të duan, qoftë aleancë ndërmjet tyre, qoftë ndonjë aleancë tjetër që mundohen të bëjnë ne do shohim punën tonë.