Alban Hoxha: Partizani mund ta fitojë titullin, qëllimi ndaj Dinamos është fitorja

Kapiteni i Partizani, Alban Hoxha ka folur para mediave ditën e sotme në prag të derbit me Dinamon, që do të zhvillohet ditën e nesërme në “Elbasan Arena” duke filluar nga ora 19:45. Hoxha u shpreh se Partizani deri tani është penalizuar nga gabimet individuale, por shton se i kanë mundësitë për të fituar titullin kampion. Gjithashtu ai u shpreh se të kuqtë duhet të jenë të kujdesshëm në ndeshjen e nesërme, pasi mund ta pësojnë nga Dinamo.

“Kemi luajtur mirë në 3 ndeshje, jemi penalizuar nga gabimet individuale. Duhet të kemi kujdes në mbrojtje, të mos gabojmë si më përpara. Loja do jetë e njëjtë, thjeshtë të minimizojmë gabimet. Më vjen mirë që është rikthyer Dinamo. Këto ekipe duhet të jenë në elitë. Kam kaluar 6 vite të bukura atje. Isha edhe kur dolëm kampion me profesorin. Është ndjesi e bukur, po presim. E kemi përgatitur ndeshjen dhe shpresojmë të marrim 3 pikët e para. Kapiteni ka përgjegjësi kurdo, jo vetëm në derbi. Normal bie barra më e madhe te ne lojtarët me eksperiencë. Ne i marrim përgjegjësitë. Duhet t’i largojmë nga përgjegjësia djemtë e rinj. Po e bëmë ne, për të tjerët do të jetë më e lehtë.

Ne i analizojmë ndeshjet, me video. Kemi biseduar dhe thelbi është që të gabojmë sa më pak në mbrojtje dhe të shfrytëzojmë rastet në sulm. Me Vllazninë patëm shumë raste. Po të finalizonim, do e përmbysnim. Edhe me Teutën, po të shënohej penalltia mund të shkonte ndryshe. Dinamo pa humbje? Edhe Dinamo do humbë, si të gjithë. Nuk kemi dëshirën më të madhe t’u shkaktojmë humbjen e parë, por të marrim fitoren vetë. Objektivi është të jemi sa më afër kreut. Dinamo është ekip i fortë, mbron mirë si ekip dhe ka sulm të rrezikshëm. Duke i parë këto, duhet të jemi të kujdesshëm prapa. Pastaj t’ia lëmë fushës, pasi varet si merret ndeshja.

Stadiumi? Po të luhej në ‘Air Albania’ do ishte më mirë, edhe pse Elbasani nuk është larg. Shpresoj që këto gjëra që nuk janë në dorën tonë të ndryshojnë. Edhe ne po përpiqemi të luajmë në stadiumin tonë.

Titulli? Kemi lojtarë të talentuar dhe një grup të mirë. I kemi mundësitë edhe për të dalë kampionë, por kjo bëhet me punë dhe sakrificë. Kampionati është i gjatë dhe nëse jemi në një mendje e duam të punojmë, mund t’ia dalim pasi i kemi të gjitha mundësitë”, u shpreh Hoxha.