Derbi historik Partizani-Tirana/ Matraxhiu: Pavarësisht objektivave të ndryshme, do të jetë një sfidë e barabartë në shanse

Derbi i kryeqytetit, Partizani-Tirana, do të zhvillohet të dielën në orën 16:30, në stadiumin “Air Albania”.

Përballja mes dy rivalëve historikë konsiderohet si ndeshja më e rëndësishme në futbollin shqiptar. Këtë sezon, megjithatë, të dy klubet po garojnë për objektiva të ndryshme në kampionat.

Andi Matraxhiu, menaxher futbolli, u shpreh për “MCN Informacion” se, pavarësisht synimeve të ndryshme të skuadrave, derbi pritet të jetë i barabartë.

Për Tiranën është një moment i mirë. Në pesë ndeshjet e fundit ka arritur të marrë 11 pikë dhe, pavarësisht humbjes në Kupë, fokusi tashmë është përqendruar te kampionati. 

Eliminimi nga Kupa nuk besoj se do të ndikojë psikologjikisht, pasi skuadra e ka të qartë objektivin e saj dhe po e sheh kampionatin si prioritet. 

Unë e shoh Tiranën si një skuadër që do të jetë e barabartë në shanse në këtë derbi. 

Sipas Matraxhiut, edhe Partizani vjen në një moment pozitiv.

Fitorja në Ballsh dhe suksesi në Kupë e kanë përmirësuar gjendjen psikologjike të skuadrës. Në ndeshje si derbi nuk ka nevojë për shumë stimulim, lojtarët japin maksimumin në fushë.

Sa i përket objektivave, ato mbeten të ndryshme, Partizani synon të sigurojë një vend në katërshen e parë, ndërsa Tirana lufton për t’iu shmangur rënies nga kategoria. Megjithatë, kjo nuk e zbeh balancën e sfidës.

Të dyja skuadrat kanë objektiva të rëndësishëm. Lufta në fund të tabelës është shumë e fortë, por në fund unë shoh një përballje të barabartë në shanse.