Këtë fundjavë Shkëndija e Tetovës u shpall kampionë në Maqedoninë e Veriut, një skuadër e cila e cila drejtohet nga Ernest Gjoka, trajner i dalë nga Superliga shqiptare. I ftuar në emisionin ‘Skaner’ në MCNTV ai u shpreh se është shumë e vështirë që një trajner shqiptar të fitojë jashtë vendit.  

‘Të fitosh një titull është shumë e vështirë, aq më shumë kur nuk ndodh në vendin tënd. Mendoj se ka qenë shumë e vështirë edhe për shkakun se kjo Shkëndijë ka 6-7 muaj që është formuar.

Unë mendoj se ka ndryshim me kohën kur unë u shpalla kampion me Kukësin. Shkëndija është një skuadër që sulmohet shumë, pasi nuk luhet vetëm për futboll dhe lufta është shumë e vështirë. Janë faktorë politikë pasi jemi skuadër shqiptare. Do shumë mund për të shkuar përpara edhe pse në këto 7 vite është strukturuar shumë mirë. Është e financuar mirë,’-u shpreh Gjoka.

Më tej trajneri foli për kampionatin shqiptar: ‘Nuk mund të flas për titullin në Shqipëri, por mendoj se ajo skuadër që do ta mbajë presionin e garës do dalë kampion. Aktualisht nuk shoh asnjë nga pesë skuadrat që të ketë diferencë me të tjerat.’