Skandali Balogun nuk e lëkund Infantinon, 200 federata i japin mbështetje për mandatin e katërt

Gianni Infantino ka siguruar mbështetjen zyrtare të më shumë se 200 federatave anëtare të FIFA-s për të kandiduar për një mandat të katërt si president i organizatës, pavarësisht debatit të krijuar pas skandalit që lidhet me pezullimin e sulmuesit Folarin Balogun.

Siç raporton The Guardian, vetëm një numër i kufizuar federatash nuk kanë paraqitur ende letra mbështetëse. Mes tyre spikat Federata Gjermane e Futbollit, e cila deri tani nuk ka konfirmuar publikisht përkrahjen për kreun aktual të FIFA-s.

Afati për paraqitjen e kandidaturave është 18 nëntori. Deri në atë datë, federatat kanë mundësi të tërheqin ose ta transferojnë mbështetjen e tyre te një kandidat tjetër. Megjithatë, Infantino mbetet deri tani kandidati i vetëm për zgjedhjet që do të zhvillohen në Kongresin e FIFA-s në mars, ku pritet të fitojë me një shumicë të thellë votash.

Disa federata pretendojnë se kanë qenë objekt i presionit nga brenda FIFA-s për të konfirmuar mbështetjen ndaj Infantinos, një praktikë që në teori bie ndesh me kodin etik të organizatës.

Pavarësisht polemikave të fundit, përfshirë reagimet pas deklaratave të presidentit amerikan Donald Trump, i cili pranoi se kishte lobuar pranë FIFA-s për rishikimin e kartonit të kuq të Folarin Balogun në ndeshjen ndaj Bosnjë dhe Hercegovinës, pozitat e Infantinos mbeten të forta.

Mbështetja nga federatat evropiane nuk konsiderohet vendimtare për rizgjedhjen e tij, pasi ai gëzon përkrahje të gjerë nga pjesa tjetër e botës. Megjithatë, shumica e federatave evropiane kanë dërguar tashmë letrat e mbështetjes, përfshirë edhe Federatën Angleze të Futbollit.

Ndërkohë, brenda qarqeve të futbollit evropian është diskutuar mundësia e paraqitjes së një kandidati alternativ, por deri tani nuk ka një emër që të gëzojë konsensus të mjaftueshëm për të sfiduar seriozisht Infantinon.

UEFA vazhdon të ketë mosmarrëveshje me FIFA-n për disa çështje të fundit, si rasti Balogun dhe përjashtimi i arbitrit somalez Omar Artan nga Kupa e Botës. Megjithatë, mbetet e paqartë nëse organizata evropiane do të mbështesë zyrtarisht një kandidat rival.

Burime pranë futbollit evropian vlerësojnë se edhe një kandidat që do të siguronte 30 deri në 40 vota do të ishte i mjaftueshëm për të nxitur një debat më të gjerë mbi qeverisjen dhe drejtimin e FIFA-s.

Federatat anëtare do të mblidhen këtë të shtunë në Nju Jork, në një takim të drejtuar nga vetë Infantino. Megjithatë, skandalet e fundit nuk pritet të jenë pjesë e axhendës zyrtare. Në fokus të diskutimeve pritet të jenë rezultatet financiare të Kupës së Botës dhe mënyra se si të ardhurat do të shpërndahen mes federatave anëtare.