Anëtari i Komitetit Ekzekutiv në FSHF, Arben Dervishaj i ftuar në emisionin “Skaner” në MCN TV, foli për Asambletë që po mbahen në Shoqatat Rajonale. Dervishaj tha se anëtarët i kanë bërë të ditur atij, se kanë presione të mëdha, ndërsa shtoi se politika po e ndan sportin.
“Shoqatat po vazhdojnë Asambletë e tyre, sipas planit të parë. Unë dhe Libohova, ishim në Korçë dhe Gjirokastër, në Shoqatat Rajonale. Në Korçë mungonte përfaqësuesi i Bilishtit dhe Ersekës dhe njëri nga përfaqësuesit e Pogradecit. Në mbledhjen e KE që është bërë, janë caktuar persona të caktuar, për të qenë në cilësinë e vëzhguesit. Të njëjtën gjë bën edhe FIFA me UEFA, kur ne kemi zgjedhje.
Mospublikimi i listave? Normalisht të gjitha Shoqatat kanë dhënë emrat e anëtareve. Por, ka diçka, që ngatërrohen anëtarët me delegatët.
Nuk mund të them dot emra konkretë, që kanë bërë presione, por nga ato që na thonë anëtarët tanë, ka një presion të madh. Jemi mësuar me këto presione, në 2006 apo edhe në 2018. Më vjen keq që politika po e ndan sportin. Po e bëjnë njëjtë siç veprojnë vetë. Të na lënë, sporti i zgjidh vetë problemet e veta. Stadiumi i Partizanit do të jetë gati nga muaji maj.”, u shpreh Dervishaj.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
