Kukësi arrin një fitore me shumë vlera, duke mposhtur Skënderbeun minimalisht, ndonëse për shumicën e kohës luajti me një futbollist më pak. Ishte Vasil Shkurtaj, i cili në debutimin e tij pas rikthimit, shënoi golin e vetëm të ndeshjes, duke i dhënë 3 pikët verilindorëve.
Ndeshja në “Loro Boriçi” nisi e qetë, me Kukësin që kishte zotërimin e topit dhe Skënderbeun që priste në mbrojtje, për të provuar me kundërsulm.
Në minutën e 35-të, ndodhi edhe episodi që ndryshoi rrjedhën e ndeshjes. Sulmuesi i Skënderbeut, Mensah përfiton nga një top i kthyer gabimisht nga verilindorët dhe niset në drejtim të portës, aty portieri Tafas e ndal në mënyrë të parregullt dhe ndëshkohet me karton të kuq.
Në lojë futet Xhika, i cili merr vendin e Bytyçit dhe menjëherë është protagonist. Portieri i Kukësit, i ndihmuar edhe nga tranversa, pret një gjuajtje mjeshtërore të Marës nga goditja e dënimit.
Në minutën e 44-t, skuadra e Longos kishte mundësinë më të mirë për të shënuar, por gjuajtja e Gjelbrim Taipit brenda zonës, u ndal nga shtylla.
Pjesa e dytë nisi me Kukësin përsëri në sulm, ku Gjelbrim Taipi, vë në provë Rexhepin nga goditja e dënimit, por portieri i korçarëve reagon mirë dhe largon rrezikun.
Shkëndijën e parë në pjesën e dytë Skënderbeu e dha në minutën e 58-të, kur Mara pas një kundërsulmi, gjuan nga jashtë zone, por Xhika pret dhe i mohon golin korçarëve.
Në minutën e 69, ishte Mensah që mori një top të shkëlqyer në zonë nga Nikaj, por nuk e shfrytëzoi si duhej. Pikërisht Nikaj, 1 minutë më vonë, pa që gjuajtja e tij me kokë të ndalej nga Xhika.
Longo provon gjithçka për gjithçka në minutën e 76-të, duke nxjerrë nga fusha një mbrojtës si Dragoshi dhe hedh në fushë debutuesin Vasil Shkurtaj. Ky i fundit është menjëherë protagonist absolut, teksa pas 2 minutave në fushë, topin e parë që prek e ndal në fundin e rrjetës, duke i dhënë avantazhin verilindorëve, pas një asisti perfekt të Gjelbrim Taipit.
Heroi i Kukësit në fund ishte Xhika, i cili në minutën e 90-të, ndal topin e gjuajtur nga Nikaj, i cili që po i drejtohej fundit të rrjetës.
Me këtë fitore, Kukësi shkon në kuotën e 31 pikë, po aq sa Laçi i vendit të dytë dhe 3 pikë më pak se Tirana kryesuese, me të cilët përballen javën e ardhshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
