Ish-futbollisti Ardi Behari, në emisionin “Skaner” në MCN TV, duke folur për barazimin e Vllaznisë ndaj rumunëve të Craiova, e quajti si një mbrëmje ndryshe të ekipeve shqiptare në Europë.
Behari deklaroi se trajneri Josa ndryshoi rrjedhën e ndeshjes në pjesën e dytë, me ndryshimet nga stoli, por edhe me ndryshimin e skemës. Gjithashtu ai tha se Marku i dha frymëmarrje ekipit, ndërsa për tifozët u shpreh se ishin të shkëlqyer.
Jo vetëm nga rezultati, por edhe nga atmosfera e krijuar në Shkodër, ishte një mbrëmje ndryshe e kësaj vere europiane për skuadrat shqiptare. Por, edhe nga ana e rezultatit, janë pozitive, në krahasim me skuadrat që kanë dalë nga gara. Ishte një mbrëmje pozitive dhe e shijuam.
Në minutat e para në ndeshjen e Vllaznisë, ishte një sfidë me kujdes nga të dyja skuadrat. Ishte kujdes pak më i tepruar nga sa duhej nga ana e Vllaznisë, kjo për faktin se manovra sulmuese ishte e ngadaltë dhe nuk po shkonte ashtu siç mund ta kishte përgatitur Josa. Nëse shikojmë, Craiova ishte vendosur me një 4-4-2 të pastër dhe nxjerrja nga poshtë e topit, ka vështirësitë e saj sepse zonat janë të mbyllura.
Pjesa që bëri diferencën në këtë ndeshje, ishin ndryshimet e bëra në fillim të pjesës së dytë. Në mendimin tim, nuk ishte vetëm ndryshimi i lojtarëve, por edhe i sistemit të lojës. Kaluan në një 4-3-3 me kulm poshtë. Hapësira u krijuan më shumë se në pjesën e parë. Futja në lojë e Markut, i dha goxha frymëmarrje skuadrës. Liroi edhe mbrojtësit e krahut, për të ecur përpara. Në tërësinë e saj, ndeshja i kishte të dyja tablotë, për shkak të frikës dhe presionit të tifozëve. Ata ishin jo vetëm lojtari i 12 për ekipin, por kanë qenë të shkëlqyer.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
