Vllaznia do finalen e Kupës, Sedloski: Lojtarët duhet të justifikojnë fanellën, shkojmë në Europë

Trajneri i Vllaznisë, Goce Sedloski, foli për mediat, në prag të sfidës së kthimit me Egnatian, në gjysmëfinalen e Kupës së Shqipërisë.

Pas barazimit 1-1 në ndeshjen e parë në Shkodër, kuqeblutë do të kërkojnë me çdo kusht fitoren, për të shkuar në finale.

Sedloski zbuloi se do të ketë mungesa të rëndësishme, por shtoi se lojtarët duhet të justifikojnë fanellën që mbajnë veshur. Ai tha se beson që skuadra e tij do të shkojë në Europë, që është edhe objektivi aktual.

Kanë mbetur edhe 4 ndeshje deri në përfundim të kampionatit. Si çdo tjetër, edhe ndeshja e nesërme është shumë e rëndësishme. Duhet të mbledhim mendjen, pasi është fundi i kampionatit. Dua ta luajmë ndeshjen sa më mirë të jetë e mundur.

Duhet të jetë një ndeshje krejtësisht tjetër nga ato që kemi bërë në kampionat, edhe pse kemi shumë mungesa. Egnatia është një ekip shumë i mirë, e dimë çfarë humbjesh na kanë shkaktuar. Kemi mungesa si Gurishta, Balaj, Smajli, por ato lojtarë që kanë mbetur duhet të tregojnë karakter, të japin energji, ta justifikojnë fanellën të cilën po mbajnë veshur.

Nga Vllaznia të gjithë presin Europën dhe besoj se do ia dalim. Jam person që nuk dorëzohem derisa të arrij qëllimin dhe kam shumë besim se do ia dal me këtë ekip. Këtë mundohem ta transmetoj te të gjithë lojtarët sa herë më jepet mundësia. E di pse kam ardhur këtu.

Me gjithë mungesat dhe grupin është shumë e vështirë. Jam i detyruar të vendos lojtarë në pozicione në të cilat ato vetë nuk kanë luajtur më parë. Në futboll nuk ka ‘nuk mundem’. Secili do të përmbushë detyrën që i cakton trajneri. Nuk i pranoj justifikime të tilla.