Kalimi i Hirving Lozanos tek Napoli në verën e 2019-tës ka rezultuar një operacion i qëlluar në shenjë për ‘’ Azurrët ‘’ sepse meksikani ka ditur të adaptohet shumë shpejt me Serinë A .
Me kalimin e kohës 25 vjeçari është shëndërruar në një element efikas për skemat e Gennaro Gatussos duke i dhënë një shtysë shumë të vyer funksionimit total të repartit të avancuar .
Ishi i Psv Eindhovenit tashmë ka arritur të prekë majat me Napolin dhe e ka justifikuar plotësisht shifrën e 40 milionë eurove që direktiva e një prej klubeve më të njohura të Calcios derdhi në arkat e hollandezëve .
Situata për Hirving Lozanon tashmë mund të shikohet me një tjetër optikë sepse paraqitjet mbresëlënëse kanë tërhequr vëmëndjen e Juventusit . Ideja e rikuperimit të identitetit fitues mbetet opsioni numër një i ‘’ Zonjës së Vjetër ‘’ dhe për finalizimin me sukses të saj bëhet e domosdoshme ndërhyrja në merkato .
Traineri i bardhezinjve Andrea Pirlo është treguar i qartë në kërkesat e tij për sa i përket sezonit vijues në të cilin do të kërkojë me padiskutim lënien pas të aktualit që nuk po e lë të ngrejë kokë dominuesin absolut të Italisë gjatë sezoneve të fundit. E ardhmja e sigurtë në stolin e 36 herë kampionëve të Scudettos nënkupton përqëndrimin maksimal tek prurjet e merkatos për të rikshkruar historinë si në kampionat ashtu edhe në kompeticionin e shumëdëshiruar si Uefa Champions League .
Një transferim i mundshëm i Hirving Lozanos në Torino do të evidentonte automatikisht shitjen e një lojtari për të balancuar disi aspektin ekonomik . Në lidhje me këtë çështje parashikohet se lojtari i penalizuar do të jetë Federico Bernardeschi sepse nuk i ka përmbushur ashtu siç duhet pritshmëritë e numrit një të pankinës duke e lënë të hapur derën për një largim të mundshëm nga ‘’ Allianz Stadium ‘’ gjatë merkatos verore .
Për më tepër lojtari i lindur në qytetin e Meksikos do ti hapte rrugën një funksionimi ndryshe të repartit të avancuar sepse karakterizohet nga një teknikë brilante e cila ndërthuret në perfeksion me shpejtësinë , aspekt që me siguri do ta bënte më interesant sulmin e juventinëve gjatë sezonit vijues .
Edhe pse momentalisht Juventus nuk ka bërë një ofertë konkrete për yllin e napoletanëve, duke marrë parasysh cilësitë e mrekullueshme të tij krerëve të klubit do ti duhet ti bëjnë mirë llogaritë sepse në rastin e një largimi nga ‘’ Diego Armando Maradona ‘’ do të fuqizonin kundërshtarin më të rrezikshëm për fitimin e Scudettos .
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
