Kukësi ka zyrtarizuar ditën e sotme dy largime nga skuadra. Bëhet fjalë për sulmuesin Patrick Eze dhe mbrojtësin Mehdi Hetemaj.
Ky i fundit largohet si lojtar i lirë, pasi ka ndërprerë kontratën me marrëveshje, ndërsa sulmuesi nigerian është shitur te skuadra nga Katari, Al Ahli. Eze ishte një nga lojtarët më të spikatur te skuadra e Kukësit në sezonin që lamë pas, teksa arriti të shënojë plot 15 gola në Kategorinë Superiore. Nigeriani u bashkua me verilindorët në merkaton e verës së kaluar dhe aventura në Shqipëri ka zgjatur vetëm një sezon.
Nga ana tjetër, Hetemaj kishte edhe një vit kontratë me Kukësin, por duke parë minutat e pakta në dispozicion, lojtari i ka kërkuar drejtuesve mbylljen e kontratës dhe kështu ndodhi. Pas sezonit zhgënjyes, te Kukësi priten ndryshime të mëdha në verë, me drejtuesit që do të kërkojnë të formojnë një skuadër pretendente.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
