Federata Ndërkombëtare e Futbollit (FIFA) ka njoftuar se do të nxjerrë në shitje një numër shtesë biletash për Kupën e Botës, duke filluar nga e mërkura në orën 15:00 GMT, për të gjitha 104 ndeshjet e turneut.
Biletat do të jenë të disponueshme në Kategoritë 1, 2 dhe 3, ndërsa përjashtohet kategoria e re premium, e prezantuar së fundmi nga organizata.
Megjithatë, ky vendim vjen mes reagimeve negative nga tifozët, të cilët kanë kritikuar shtimin e kategorive të reja dhe më të shtrenjta të biletave.
Shumë prej tyre pretendojnë se vendet më të mira janë mbajtur të fshehura gjatë shitjes fillestare, duke i lënë ata me opsione më pak të favorshme.
Çmimet e biletave kanë pësuar rritje të ndjeshme që nga dalja e tyre në treg në dhjetor. Fillimisht, ato varionin nga 140 dollarë për ndeshjet e fazës së grupeve në Kategorinë 3, deri në 8,680 dollarë për finalen.
Por pas rihapjes së shitjeve më 1 prill, çmimi maksimal për finalen arriti në 10,990 dollarë. Ndërkohë, raportimet e fundit tregojnë se interesimi për disa ndeshje mbetet më i ulët se pritej.
Sipas një dokumenti të cituar nga “The Athletic”, deri më 10 prill ishin shitur rreth 40,934 bileta për ndeshjen hapëse të SHBA-së kundër Paraguait, ndërsa kapaciteti i stadiumit SoFi në Los Angeles pritet të jetë rreth 69,650 vende.
FIFA ende nuk ka komentuar zyrtarisht lidhur me kritikat për kategoritë e reja të biletave, ndërsa mbetet për t’u parë nëse kërkesa do të rritet me hapjen e fazës së re të shitjeve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
