Arbitri i ndeshjes Danimarkë-Finlandë, Anthony Taylor, ka folur për herë të parë në lidhje me rastin e Christian Eriksen, i cili atë ditë pësoi një arrest kardiak në fushë. Në fjalët e tij, arbitri anglez ka thënë se e kuptoi që në fillim që problemi ishte serioz, duke shtuar më tej se heronjtë e vërtetë që e shpëtuan mesfushorin ishin Kjaer dhe mjekët.
“E kuptova menjëherë që kishte problem serioz. Christian ishte vetëm në atë moment. Po shikoja kur ai ra përmbys, mund t’ia shikoja edhe fytyrën. E dija se nuk ishte në rregull që në fillim, për shkak të asaj se si i dukej fytyra dhe për mënyrën se si ra. Kjo ishte ajo që më shqetësoi më shumë.
Prioriteti im kryesor është siguria e lojtarëve dhe menjëherë kërkova ndihmë mjekësore. Heronjtë e vërtetë atë natën ishin kapiteni danez Simon Kjaer dhe mjekët që i bënë CPR dhe debrifilacionin në fillim. Futbolli në ato momente është i parëndësishëm, në fund të fundit ne jemi të gjithë njerëz.
Kryesorja ishte që Christian ishte mirë dhe mori ndihmën që i duhej. Pastaj duhet të siguronim lojtarët që ishin në rregull, sikurse edhe pjesa e ekipit tim të arbitrave. Kishim vendosur të pezullonim ndeshjen derisa ta mësonim si ishte Eriksen.
Ishte informacioni më i rëndësishëm para se të merrnim një vendim për ndeshjen. Me ekipin tim nuk fola dot, kurse me gruan nuk ndodhi deri në 2-3 orë pas ndeshjes. Kishte kaq shumë gjëra atë ditë. Një nga arbitrat u kishte dërguar mesazhe të gjitha familjarëve tanë, për t’u thënë që të mos shqetësoheshin e se të gjithë ishim mirë. Kishim të bënim me një situatë që të gjithë mund ta shihnin në TV.
Nuk kam folur me Eriksen personalisht. I dërgova mesazh disa ditë pas incidentit. Fola me Schmeichel para se të largoheshim nga stadiumi pas ndeshjes.”, përfundoi arbitri.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
