Peshëngritësi Briken Calja ka bërë një arritje historike ditën e sotme në Uzbekistan, aty ku mbahet Kampionati Botëror i Peshëngritjes. Calja i ka siguruar Shqipërisë 3 medalje, 1 ari dhe 2 argjendi.
Medaljen e arit Calja e fitoi në stilin e shkëputjes, ndërsa medaljet e argjendit në shtytje dhe dy garësh. Në stilin e shkëputjes ai ngriti me sukses 152 dhe 154 kg. Calja ngriti me sukses në provën e fundit edhe 156 kg, diçka që nuk e bëri dot tajlandezi Jeeram. Kështu Calja bën një arritje historike, duke u shpallur kampion bote deri në 73 kg.
Nuk bëri dot të njëjtën gjë edhe Erkand Qerimaj, i cili ngriti me sukses në provën e parë 150 kg, ndërsa dështoi në të dytën me 153 kg. Ndonëse Qerimaj realizoi me sukses provën e tretë, u rendit në vendin e katërt, pas rusit Sergei Petrov.
Në shtytje, Calja bëri mirë në dy provat e para me 182kg dhe 186 kg, ndërsa nuk ngriti 190 kg. Kjo e zbriti shqiptarin në vendin e dytë, pasi peshëngritësi nga Indonezia, Rahmat Erwin Abdullah, i kaloi me sukses të 3 provat, duke u renditur i pari, në shtytje dhe dy garësh.
Edhe këtu Qerimaj u rendit i katërti, duke mos u futur dot në zonën e medaljeve, pasi dështoi në provën e parë me 180 kg, dhe të tretë me 183 kg, ndërsa ngriti me sukses vetëm në provën e dytë 180 kg.
Gjithsesi, bilanci me një medalje ari e dy argjendi, mbetet më i miri i arritur ndonjëherë nga peshëngritja shqiptare në Botëror.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
