Presidenti i Tiranës, Refik Halili, në emisionin “Skaner” në MCN TV, zbuloi meritat për fitimin e titullit kampion te bardheblutë. Numri 1 i bardhbluve u shpreh se për titullin merita është e stafit drejtues, por padyshim edhe e lojtarëve.
Kemi pasur edhe fatin, por mbi të gjitha fati është edhe nga përzgjedhja që kemi bërë, duke filluar që nga trajneri. Besuam shumë edhe te drejtori Osmani, i cili ka bërë një punë të shkëlqyer. Pjesa e kryesore janë edhe futbollistët, përzgjedhja e të cilëve është edhe fat edhe zotësi nga stafi. Limajn e kërkoi trajneri që në fillim. Është bërë një punë shumë e mirë. Pa harruar edhe mbështetjen e madhe të tifozerisë.
Në lidhje me trajnerin Orges Shehi, ai deklaroi se skuadra e do shumë dhe gjithmonë i dalin në krahun e tij. Halili zbuloi edhe bisedën me trajnerin, para se t’i besonte drejtimin e skuadrës.
Gjatë gjithë kohës, unë kam pasur besim për trajnerin Shehi. E kam ndjekur që kur ishte trajneri i Korçës dhe te Kukësi. Takimin e parë e kam pasur shumë të shkurtër dhe i thashë se doja t’i besoja drejtimin e Tiranës. I thashë që nuk do e bezdisë askush. Gjithashtu i thashë se në rast se dështon, atëherë duhet të hapë krahun, ndërsa nëse fiton, mund të rrijë gjatë te Tirana. Ka mënyrën e tij të komunikimit. Të gjithë futbollistët, nëse unë shkoj si president i kam të gjithë kundër dhe i dalin në krah trajnerit. Kjo është gjëja më e mirë që është arritur në klub. Ka një frymë të jashtëzakonshme në skuadër.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
